Монголын Хуульчдын холбоо, Азийн сантай 2019 оноос хамтран хэрэгжүүлсэн “Залуу хуульчдыг чадавхжуулах замаар Монгол Улсын шүүх эрх мэдлийн тогтолцоог бэхжүүлэх нь” төсөл амжилттай хэрэгжиж, хаалтаа хийлээ.

Төслийн хаалтын үйл ажиллагаанд Америкийн Нэгдсэн Улсын Элчин сайдын яамны дэд тэргүүн Матью Ференс, Азийн сангийн суурин төлөөлөгч Марк Кейниг, Монголын Хуульчдын холбооны ерөнхийлөгч П.Одгэрэл, УДШ-ийн Эрүүгийн хэргийн танхимын тэргүүн Ч.Хосбаяр, УЕПГ-ын орлогч, төрийн хууль цаазын шадар зөвлөх М.Чинбат нар урилгаар оролцлоо.

Хаалтын үйл ажиллагаанд тус сангийн Шүүх эрх мэдлийн хөтөлбөрийн захирал Г.Гантулга “Залуу хуульчдыг чадавхжуулах замаар Монгол Улсын шүүх эрх мэдлийн тогтолцоог бэхжүүлэх нь” төслийн үйл ажиллагааны үр дүнгийн талаар мэдээлэл өгсөн. Мөн “Шинээр томилогдсон шүүгч, прокурор, шинэ хуульчийн сургалт”, “Сургагч багш бэлтгэх сургалтын үр дүн”, “Шинээр томилогдсон шүүгч, прокурор болон шинэ хуульчийг чадавхжуулахад Менторшип хөтөлбөрийн үзүүлэх үр нөлөө, цаашдын хэрэгжилт”, “Сургалтын хөтөлбөрийг цахимжуулах ажлын үр дүн, цаашдын чиг хандлага, хэрэгцээ” зэрэг сэдвүүдээр нээлттэй хэлэлцүүлэг боллоо.

Тус хэлэлцүүлэгт Монголын Хуульчдын холбооны Тамгын газрын дарга Ш.Жолбарс, Хуульчдын холбооны гишүүн хуульч, шүүгч Д.Халиуна, хуульч, өмгөөлөгч, ментор Б.Баттуул, УЕП-ын туслах прокурор, Сургалт, судалгааны хүрээлэнгийн захирал Б.Бат-Орших, Сургалтын албаны хяналтын прокурор Я.Мөнхзаяа, Ц.Хашбаатар, Бодлого төлөвлөлт, хяналт-шинжилгээ, үнэлгээний хэлтсийн хяналтын прокурор Ч.Хандмаа, Шүүхийн сургалт, судалгаа, мэдээллийн хүрээлэнгийн захирал Д.Эрдэнэчимэг, Сургалтын албаны дарга Г.Халиунаа, Сүхбаатар дүүргийн Иргэний хэргийн анхан шатны шүүхийн ерөнхий шүүгч Н.Оюунтуяа, Баянзүрх дүүргийн Эрүүгийн хэргийн анхан шатны шүүхийн ерөнхий шүүгч Н.Одонтуул болон МУИС-ийн Боловсрол судлал, арга зүйн тэнхимийн эрхлэгч Г.Баярмаа нар оролцож төслийн хүрээнд хийгдсэн ажлын талаар өөрсдийн байгууллагуудад гарсан үр дүн, цаашид анхаарах асуудлуудын талаар хэлэлцүүлэг өрнүүллээ.