Монголын хуульчдын холбоо АНУ-ын Худалдааны яамны  Хуулийн газрын Арилжааны эх зүйн хөгжлийн хөтөлбөрийн  Дарга  Стифен Гарднер, Олон улсын хөтөлбөрийн  Зөвлөх Гришма Прадхан, болон Ахлах мэргэжилтэн Максвелл Грубер нарыг 2023 оны 12 дугаар сарын 01-ний өдөр хүлээн авч уулзлаа.

АНУ-ын худалдааны яамны Арилжааны эрх зүйн хөтөлбөр нь хөгжиж буй улс орнуудын бизнесийн эрх зүйн орчныг боловсронгуй болгох чиглэлээр үйл ажиллагаа явуулдаг бөгөөд эдгээр улсуудын хуульч, судлаач, төрийн албан хаагчдад зориулан бизнес, арилжааны эрх зүйн чиглэлээр сургалт явуулах, олон улсын сайн жишгийг танилцуулах, нэвтрүүлэх зэрэг хууль зүйн текник туслалцаа үзүүлдэг  хөтөлбөр юм.

Тус хөтөлбөр нь 2023 онд Монголын Хуульчдын холбооны хүсэлтээр МХХ-ны хуульчдад “Олон улсын арилжааны арбитр”, “Хөрөнгө оруулагч-Засгийн газар хоорондын маргааныг шийдвэрлэх нь”, “Төр хувийн хэвшлийн түншлэл” сэдвүүдээр  сертификат олгох сургалтуудыг зохион байгуулсан билээ.

Өнөөдрийн уулзалтаар 2023 онд зохион байгуулсан сургалтын үр дүнг дүгнэж, тус хөтөлбөрийг 2024 онд Монголын хуульчдын холбоонд үргэлжлүүлэн хэрэгжүүлж, талуудын Хамтран ажиллах гэрээг дахин сунгахаар тохиролцлоо. Талууд шинэчилсэн гэрээний хүрээнд 2024 онд цаашид сургалтын төрөл, чиглэлийг нэмэгдүүлэх,  сургалтын хөтөлбөрийг илүү өргөжүүлэхээр санал нэгдлээ.

Уулзалтад Монголын хуульчдын холбооны Ерөнхийлөгч П.Одгэрэл, Тамгын газрын Дарга Ш.Жолбарс, Монголын хуульчдын холбооны Олон Улсын эрх зүйн хорооны Тэргүүн Х.Наранбулаг, Гадаад харилцааны Мэргэжилтэн Г.Болор-Эрдэнэ нар оролцов.