2023 оны 12 дугаар сарын 01-03-ны өдрүүдэд Филиппин Улсын Себу хотод зохион байгуулагдсан Азийн Про Боно 12 дахь чуулга уулзалтаас 2025 онд зохион байгуулах Азийн Про Боно 13 дахь Чуулга уулзалтыг Монгол Улсад зохион байгуулахаар шийдвэрлэсэн ба тус үйл ажиллагааг зохион байгуулах МХХ-ны ажлын хэсэг болон Азийн Про Боно чуулга уулзалтыг зохион байгуулах хороо буюу BABSEACLE-ын хамтарсан хуралдаан боллоо.
Тус хуралд Монголын Хуульчдын холбооны ерөнхийлөгч П.Одгэрэл, Тамгын газрын дарга Ш.Жолбарс болон Хуульчийн нийтэд тустай мэргэжлийн үйл ажиллагаа эрхлэх асуудал эрхлэх хорооны тэргүүн Г.Цагаанбаяр, Удирдах Зөвлөлийн гишүүн Л.Энхсайхан, М.Мөнхжаргал, А.Энхтуяа, Олон Улсын эрхзүйн хорооны Тэргүүн Х.Нарабулаг, Байгаль орчны эрх зүйн дэд хорооны зохицуулагч Р.Лхагвабаяр болон Тайланд Улсын Бангконг хотод төвтэй Азийн Про Боно чуулга уулзалтыг зохион байгуулах хороо буюу BABSEACLE-ын Тэргүүн Брюс Ласки, тус хорооны нарийн бичгийн газрын ажилтнууд цахимаар оролцлоо.
Ажлын хэсгийн хурлаар Азийн Про Боно 13 дахь чуулга уулзалтыг 2025 оны хэдэн сард зохион байгуулах өдрийн тов, үндсэн болон салбар хуралдаануудын сэдэв, чуулга уулзалтын бэлтгэл ажлыг хэрхэн хангах талаар санал, мэдээлэл солилцов.
Азийн Про Боно чуулга уулзалт нь бүс нутгийн хэмжээнд зохион байгууллагддаг томоохон үйл ажиллагаа бөгөөд хууль зүйн үнэ төлбөргүй үйлчилгээний хүртээмжийг нэмэгдүүлэхийн төлөө Про Боно ажлыг идэвхтэй хийдэг Азийн хуульчдын мэдлэг, туршлагыг хуваалцах, Про Боно соёлыг бусад хуульчдад түгээн дэлгэрүүлэхэд чиглэсэн олон төрлийн сэдвээр хэлэлцүүлэг өрнүүлж санал бодлоо солилцох боломжийг олгодог юм.
