Монголын Хуульчдын холбооноос хуульчдын эрх, хууль ёсны ашиг сонирхол зөрчигдөж буй асуудал болон шүүхийн байрны нөхцөл байдлыг судлах, тулгамдаж буй асуудлын талаар санал солилцох, хамтран ажиллах зорилгоор шүүхүүдийн үйл ажиллагаатай танилцаж байгаа билээ.

    Энэ ажлыг хүрээнд Монголын Хуульчдын холбооны Ерөнхийлөгч П.Одгэрэл тэргүүтэй төлөөлөл өчигдөр (2024.04.04) Баянзүрх дүүргийн Иргэний хэргийн шүүхийн үйл ажиллагаатай танилцах уулзалтыг зохион байгууллаа. Уулзалтад Монголын Хуульчдын холбооноос Тамгын газрын дарга Ш.Жолбарс, Шүүгчдийн хорооны тэргүүн С.Энхбаяр, Хуульчийн мэргэжлийн дүрэм, ёс зүйн асуудал эрхэлсэн хорооны дарга Д.Батболд, Хуульчдын эрх, хууль ёсны ашиг сонирхлыг хамгаалах асуудал эрхэлсэн хорооны дарга Ш.Алтангадас нар оролцсон. Уулзалтын үеэр Баянзүрх дүүргийн Иргэний хэргийн анхан шатны шүүхийн Ерөнхий шүүгч Т.Болормаа, Тамгын хэлтсийн дарга Л.Наянтай нар шүүхийн үйл ажиллагаа, ажлын байрны нөхцөл байдал, хүний нөөцийн асуудал, шүүх хуралдааны тоон мэдээлэл зэргийг танилцуулсан.  

    Тус уулзалтаар шүүгчдийн эрүүл, аюулгүй орчинд ажиллах нөхцөл болон тулгамдаж буй асуудлыг хөндөж, цаашид хэрхэн хамтран ажиллах талаар ярилцсан. Тодруулбал, тус шүүхийн хувьд ажлын байрны орчин нөхцөл тааруу, засаж сайжруулах зайлшгүй шаардлагатай байгааг дурдсан юм. Мөн шүүх хуралдааны нарийн бичгийн дарга, мэдээлэл лавлагааны ажилтанг хуульчийн мэргэжлийн шалгалтад оруулах зохицуулалтыг хуульд оруулахгүй бол хүний нөөцийн хомсдол үүсээд байгааг хэлж байсан.