Монголын Хуульчдын холбоо нь Азийн про боно 13 дахь чуулга уулзалтыг 2025 оны 10 дугаар сарын 03-05-ны өдрүүдэд Монголд зохион байгуулахаар бэлтгэл ажлыг хангаж буй юм. Энэ хүрээнд Азийн про боно чуулга уулзалтыг санаачлагч “Babseacle” байгууллагын үүсгэн байгуулагч, Ерөнхий захирал Брюс Ласки, Гүйцэтгэх захирал Вэнди Морриш нар 2025 оны 04 дүгээр сарын 14-20-ны өдрүүдэд манай улсад ажиллаж байна.

Тэднийг өнөөдөр Шүүхийн Ерөнхий зөвлөлийн дарга Н.Мөнгөнцэцэг хүлээн авч уулзлаа. Уулзалтад Шүүхийн Ерөнхий зөвлөлийн гишүүн Н.Баасанжав, Монголын Хуульчдын холбооны Тамгын газрын дарга Ш.Жолбарс, Азийн про боно 13 дахь чуулга уулзалтыг зохион байгуулах Ажлын хэсгийн гишүүн Л.Энхсайхан, Ц.Одонжав болон холбогдох бусад албаныхан оролцсон.

Уулзалтаар Азийн про боно чуулга уулзалтын талаар мэдээлэл өгч, тус чуулга уулзалтыг зохион байгуулахад Шүүхийн Ерөнхий зөвлөл хэрхэн хамран ажиллах талаар санал солилцлоо. Шүүхийн Ерөнхий зөвлөлийн зүгээс дэмжин ажиллахад бэлэн байгаагаа илэрхийлээд, “Шүүхийн про боно” үндсэн салбар хуралдаанд ач холбогдол өгч оролцохын зэрэгцээ “Шударга ёсны хүртээмж” салбар хэлэлцүүлгийг хамтран зохион байгуулах хүсэлтэй байгаагаа хэллээ.