Монголын Хуульчдын холбооны Хуульчийн нийтэд тустай мэргэжлийн үйл ажиллагаа эрхлэх хорооноос Азийн Про боно чуулга уулзалтыг санаачлагч Babseacle байгууллагатай хамтран “Хуульчийн про боно үйл ажиллагааны хөгжил, дэлхийн чиг хандлага – өнгөрсөн, одоо, ирээдүй” сэдэвт уулзалт, хэлэлцүүлгийг 2025 оны 04 дүгээр сарын 16-ны өдөр зохион байгууллаа.
Уулзалт, хэлэлцүүлгийн зочноор Babseacle байгууллагыг үүсгэн байгуулагч, ерөнхий захирал Брюс Ласки, гүйцэтгэх захирал Вэнди Морриш нар оролцож, Про боно үйл ажиллагааны тухай ойлголт, дэлхийн чиг хандлага, хөгжлийн талаар сонирхолтой мэдээлэл өгсөн.
Тус хэлэлцүүлэгт шүүгч, прокурор, өмгөөлөгч, бусад хуульчид болон хууль зүйн сургуулийн багш нарын төлөөлөл оролцсон юм.
Хэлэлцүүлгийн үеэр Babseacle байгууллагыг үүсгэн байгуулагч, ерөнхий захирал Брюс Ласки про боно гэдэг бол орлого багатай, эмзэг бүлгийн иргэдэд болон нийтийн эрх ашгийн төлөө хууль зүйн туслалцааг үнэ төлбөргүйгээр үзүүлэх гэдгийг онцолсон бөгөөд үнэ төлбөргүй хууль зүйн зөвлөгөө бүр про боно болохгүй гэдгийг хэлсэн юм.
Мөн Брюс Ласки зүгээс 2025 оны 10 дугаар сарын 03-05-нд Монголд зохион байгуулах Азийн про боно 13 дахь удаагийн чуулга уулзалтад хуульчдыг идэвхтэй оролцож, бусад орны хуульчидтай туршлага солилцож, про боног түгээн дэлгэрүүлэхийг уриалсан юм.
