Монголын Хуульчдын холбоо нь БНСУ-ын “Ди Эл Жи” хуулийн корпорацитай хамтын ажиллагааны санамж бичиг байгуулж, Монголын Хуульчдын холбооны Ерөнхийлөгч М.Мөнхбат, “Ди Эл Жи” хуулийн корпорацийн төлөөлөгч Чо Вон Хи нар өчигдөр (2026.04.22) гарын үсэг зурж баталгаажууллаа.
Энэхүү хамтын ажиллагаа нь хуульчийн про боно үйл ажиллагааг дэмжих, хүний эрхийг хамгаалах, шударга ёсны хүртээмжийг нэмэгдүүлэх чиглэлээр олон улсын хамтын ажиллагааг хөгжүүлэх зорилготой бөгөөд талууд нийгмийн эмзэг бүлгийн иргэдийн эрхийг хамгаалах, хоёр улсын хууль зүйн туслалцааны тогтвортой тогтолцоог бүрдүүлэх чиглэлээр дараах ажлуудыг хэрэгжүүлэхээр тохиролцов. Үүнд:
- Про боно үйл ажиллагааг системчлэх: Монгол Улсад про боно үйл ажиллагааг олон улсын жишгийн дагуу хөгжүүлэх, Монголын Хуульчдын холбооны дэргэд “Про боно дэмжих төв”-ийг байгуулан ажиллуулахад техник, мэргэжлийн зөвлөгөө авах;
- Туршлага солилцох: БНСУ болон Монгол Улсын хууль зүйн туслалцааны загвар, хүний эрхийн хамгаалалтын арга туршлагаас харилцан суралцах;
- Хуульчдыг чадавхжуулах: Хоёр улсын хуульч, мэргэжилтнүүдэд зориулсан сургалт, дадлага болон хамтарсан семинаруудыг тогтмол зохион байгуулах;
- Хамтарсан төсөл хэрэгжүүлэх: Нийтийн эрх ашгийн төлөөх хууль зүйн үйлчилгээний нөлөөллийн ажиллагаа болон олон улсын төсөл хөтөлбөрүүдийг хамтран төлөвлөх юм.
