Олон Улсын эрх зүйн хөгжлийн байгууллага нь Канад Улсын Засгийн газрын санхүүжилттэй “Монгол Улсад Жендэрт суурилсан хүчирхийлэлтэй тэмцэх тогтолцоог бэхжүүлэх нь” (2025–2030) төслийн хоёрдугаар шатыг эхлүүлээд байна.
Энэхүү төслийн хүрээнд Монголын Хуульчдын холбооны Ерөнхийлөгч М.Мөнхбат болон Олон Улсын эрх зүйн хөгжлийн байгууллагын суурин төлөөлөгч Чарльз Болланд нар харилцан ойлголцлын санамж бичигт 2026 оны 05 дугаар сарын 27-ны өдөр гарын үсэг зурж баталгаажууллаа.
Тус төслийн хүрээнд Монголын Хуульчдын холбоо нь Жендэрт суурилсан хүчирхийлэл болон гэр бүлийн хүчирхийлэлтэй тэмцэх, хууль сахиулах болон шүүх эрх мэдлийн байгууллагын алба хаагчдын хохирогч төвтэй хандлагыг бэхжүүлэх, холбогдох хууль эрх зүйн орчныг боловсронгуй болгох, иргэд олон нийтийн ойлголт, мэдлэгийг нэмэгдүүлэх, салбар дундын хамтын ажиллагааг эрчимжүүлэх чиглэлээр хамтран ажиллахаар тохиролцсон бөгөөд талууд хүний эрхийг хамгаалах, гэмт хэргийн хохирогчдод хууль зүйн туслалцааг мэргэжлийн түвшинд үзүүлэх чухал алхам болж буй онцолсон.
“Монгол Улсад жендэрт суурилсан хүчирхийлэлтэй тэмцэх тогтолцоог бэхжүүлэх нь” төслийн хоёрдугаар шат нь 2019–2023 онд хэрэгжсэн нэгдүгээр шатны үр дүн, хуримтлуулсан мэдлэг, туршлагад тулгуурлан хэрэгжиж, гэр бүлийн болон жендэрт суурилсан хүчирхийлэлтэй тэмцэх чиглэлээр хохирогч төвтэй хандлагыг төлөвшүүлэх, салбар дундын хамтын ажиллагаа, уялдаа холбоог бэхжүүлэхэд чиглэж буйгаараа онцлог билээ.
Төслийг таван жилийн хугацаанд хэрэгжүүлэх бөгөөд төрийн байгууллага, хууль сахиулах болон шүүх эрх мэдлийн байгууллага, иргэний нийгмийн байгууллагуудын хамтын ажиллагааг өргөжүүлж, тусламж үйлчилгээний чанар, хүртээмжийг сайжруулахыг зорьж буй юм.
