Хууль зүй, дотоод хэргийн яамнаас санаачлан Монголын Хуульчдын холбооны Захиргааны эрх зүйн хороотой хамтран "Захиргааны хэм хэмжээний актын хуульд нийцсэн байдал, хоорондын уялдаа, давхардал, зөрчлийг арилгах асуудал" сэдэвт хэлэлцүүлгийг 2023 оны 11 дүгээр сарын 09-ний өдрийн 9:00 цагт Хууль зүй, дотоод хэргийн яамны 201 тоотод зохион байгууллаа.

Тус хэлэлцүүлгийг нээж Ерөнхий сайдын захирамжаар захиргааны хэм хэмжээний актын хуульд нийцсэн байдал, хоорондын уялдаа, давхардал, зөрчлийг арилгах чиг үүрэг бүхий ажлын хэсэг байгуулагдан ажиллах болсон талаар, мөн энэ чиглэлээр цаашид Монголын Хуульчдын холбооны Захиргааны эрх зүйн хороотой идэвхтэй хамтран ажиллах сонирхолтой байгаа талаар Хууль зүй, дотоод хэргийн дэд сайд Б.Солонго танилцууллаа. Хэлэлцүүлгийн нээлтэд  Монголын Хуульчдын холбооны Ерөнхийлөгч П.Одгэрэл үг хэлэв.

Мөн “Захиргааны хэм хэмжээний акт: Концепцийн өөрчлөлт” сэдвээр Монголын Хуульчдын холбооны Захиргааны эрх зүйн хорооны тэргүүн, Нийслэл дэх Захиргааны хэргийн анхан шатны шүүхийн шүүгч Т.Мөнх-Эрдэнэ илтгэл хэлэлцүүллээ.

Хууль зүй, дотоод хэргийн дэд сайд Б.Солонго “цаашдаа захиргааны хэм хэмжээний актаар зохицуулж байсан захиргааны байгууллагын шийдвэр гаргах ажиллагааны журмуудыг салбарын хуульд нь хуульчилж, зохицуулдаг байх чиглэлийг бодлогын яам барина” гэдгийг хэлэлцүүлэгт оролцогч нарт хэлэв.

Монголын Хуульчдын холбооны Ерөнхийлөгч П.Одгэрэл хэлсэн үгэндээ “Захиргааны хэм хэмжээний актын хувьд зайлшгүй реформ хийх шаардлагатай болсон. Ингэхдээ Үндсэн хуулийн зарчимд нийцүүлэх үүднээс цаашдаа салбарын хуулиудад захиргааны хэм хэмжээний актуудыг хуулиудад тодорхой арга зүй, үе шаттайгаар шилжүүлэн хуульчлах ёстой болж байгаа” талаар хэлэв.

Монголын Хуульчдын холбооны Захиргааны эрх зүйн хорооны тэргүүн, шүүгч Т.Мөнх-Эрдэнэ өөрийн илтгэлдээ дээрх санааг бататгаж, “Захиргааны хэм хэмжээний актын тухайд ХБНГУ болон Монгол Улсын Үндсэн хуулийн үндэслэлүүд өөр. Манай улсын хувьд хууль тогтоох эрхийн шилжүүлэг маш хязгаарлагдмал хүрээнд хэрэгжих ёстой. Тиймээс цаашдаа захиргааны хэм хэмжээний актуудыг хуульд хийж өгөх. Түүний тулд тодорхой бүтэц, мэргэжилтнүүдийн нөөц бүрдүүлэх нь чухал. Үүнд Захиргааны эрх зүйн хороо хамтран ажиллахад бэлэн” талаар хэллээ.

Хэлэлцүүлэгт оролцсон хуульч, судлаачдын дунд энэ сэдвийн хүрээнд хэлэлцүүлэг явагдсан бөгөөд цаашид захиргааны хэм хэмжээний актыг боловсронгуй болгох чиглэлээр Хууль зүй, дотоод хэргийн яамнаас Захиргааны эрх зүйн хороотой хамтран төсөл хэрэгжүүлэх шаардлагатай, захиргааны хэм хэмжээний актыг хуульд хийж өгөхдөө удирдлагын шинжлэх ухааны тодорхой аргачлалуудад тулгуурлах боломжтой гэх мэт тодорхой саналууд гарлаа.