Монголын Хуульчдын холбооны Ерөнхийлөгч П.Одгэрэлээр ахлуулсан ажлын хэсэг 2024 оны тавдугаар сарын 15,16-ны өдрүүдэд Дундговь аймагт ажиллалаа.

   Ажлын хэсэг нь Монголын хуульчдын холбооны үйл ажиллагааг тайлагнах, хуульчийн үргэлжилсэн сургалт зохион байгуулах зорилготойгоор орон нутагт ажиллаж байгаа бөгөөд 3,5 багц цаг олгох хуульчийн үргэлжилсэн сургалтыг зохион байгуулсан. Тодруулбал, сургалтын хүрээнд “Татварын хуулиудын системчлэл ба хэрэглээ” сэдвээр Монголын Хуульчдын холбооны Ерөнхийлөгч, хууль зүйн ухааны доктор (Ph. D)  П.Одгэрэл, “Авто тээврийн хэрэгслийн хөдөлгөөний аюулгүй байдал, ашиглалтын журам зөрчих гэмт хэргийг шалган шийдвэрлэхэд анхаарах асуудал” сэдвээр Тээврийн прокурорын газрын хяналтын прокурор П.Итгэл, “Нотариатын мэдэгдэх хуудас шүүхийн шийдвэр гүйцэтгэх ажиллагаа явуулах үндэслэл болох нь” сэдвээр Монголын Хуульчдын холбооны Нотариатчдын хөгжлийг дэмжих хорооны тэргүүн, Нотариатчдын танхимын Ерөнхийлөгч, хууль зүйн ухааны доктор Ч.Баянжаргал, “ИХШХША-ны эрх зүй: Хүсэлт гаргах, шийдвэрлэх, нотлох баримт гаргах цуглуулах бүрдүүлэх ажиллагаа” сэдвээр Нийслэлийн Иргэний хэргийн Давж заалдах шатны шүүхийн шүүгч Э.Золзаяа, “Захиргааны ерөнхий хуулийн 47: Захиргааны акт илт хууль бус болох нь” сэдвээр Монголын Хуульчдын холбооны Захиргааны эрх зүйн хорооны тэргүүн, Нийслэлийн Захиргааны хэргийн анхан шатны шүүхийн шүүгч Т.Мөнх-Эрдэнэ, Монголын Хуульчдын холбооны Өмгөөллийн нөхөрлөлийн хөгжлийг дэмжих асуудлыг эрхэлсэн хорооны тэргүүн, “Анта-партнерс” ХХН-ийн захирал, өмгөөлөгч Д.Түвшинтамир, “Сонгуулийн хууль тогтоомжийн хэрэглээ” сэдвээр Монголын Хуульчдын холбооны сургагч багш Г.Оюунболд нар тус тус хичээл заасан. Мөн энэ үеэр Монголын Хуульчдын холбооны Тамгын газрын дарга Ш.Жолбарс Хуульчдын холбооноос хийж хэрэгжүүлсэн ажлыг тайлагнаж мэдээлэл өгсөн.

   Энэ удаагийн сургалтад Дундговь аймгийн 30 гаруй хуульч хамрагдаж хуульчийн үргэлжилсэн сургалтын 3.5 багц цагийг хангасан юм.

   Тус ажлыг хэсэг нь 2024 оны тавдугаар сарын 17, 18-ны өдрүүдэд Өмнөговь аймагт ажиллана.