Монголын Хуульчдын холбооноос жил бүрийн 05 дугаар сарын 01-ний өдрийг “Хуульчийн Про боно” өдөр болгон тэмдэглэн өнгөрүүлсээр ирсэн. Энэ жилийн про боно өдрийг угтаж Нийслэл болон 21 аймгийн Ерөнхий боловсролын 8-11 дүгээр ангийн сурагчдад “Цахим орчны зохистой хэрэглээ” сэдвээр нийт 72 сургуулийн 7906 сурагчид сургалт зохион байгууллаа.

Сургалтаар гэмт хэргийн тухай ойлголт, цахим гэмт хэрэг, түүний хохирогч болохоос урьдчилан сэргийлэх болон цахим донтолтын талаар сурагчдад таниулан, мэдээлэл өгсөн.

Хуульчийн нийтэд тустай мэргэжлийн үйл ажиллагаа эрхлэх ажлын хүрээнд тус сургалтад сургагч багшаар ажилласан орон нутгийн шүүхийн шүүгчид, Нийслэл, дүүрэг, орон нутгийн Прокурорын газрын прокурорууд, хуульч, өмгөөлөгч, улсын өмгөөлөгч, 21 аймгийн салбарын зохицуулагч нарт болон сургалтын хөтөлбөр боловсруулах, сургагч багш бэлтгэхэд хамтран ажилласан Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны тойргийн шүүхийн шүүгч Л.Галбадар, УЕПГ-ын дэргэдэх Сургалт, судалгааны хүрээлэнгийн хяналтын прокурор, доктор, дэд профессор Б.Өнөрмаа, Прокурорын хорооны тэргүүн Ж.Болорпүрэв, хуульч, өмгөөлөгч Б.Бат-Отгон, “Master Brain Mongolia” ХХК-ийн сэтгэл засалч эмч, донтох эмгэг судлаач Ж.Гантулга, Хуульчийн нийтэд тустай мэргэжлийн үйл ажиллагаа эрхэлсэн хорооны Удирдах зөвлөлийн гишүүн Б.Энхчимэг, Х.Саруул нарт ТАЛАРХАЛ ИЛЭРХИЙЛЖ, ажлын амжилт хүсье.