Монголын Хуульчдын холбооны ерөнхийлөгч П.Одгэрэл Эмнести Интернэшнлийн Олон улсын нарийн бичгийн дарга нарын газрын Хууль, бодлого эрх зүйн асуудал хариуцсан дэд захирал Ян Ветцелийг 2024 оны 11 дүгээр сарын 05-ны өдөр хүлээн авч уулзлаа.

    Уулзалтад Хуульчдын холбооны Олон улсын эрх зүйн хорооны Удирдах зөвлөлийн гишүүн Ц.Анударь, ахлах мэргэжилтэн Ж.Бариаширсүрэн, Монголын Эмнести Интернэшнлийн гүйцэтгэх захирал Б.Алтантуяа, судлаач Халим Ким, И.Балжинням, орчуулагч Ц.Санжаалхам нар оролцлоо.

     Тус уулзалтаар олон улсын эрх зүй болон олон улсын гэрээ, хэлэлцээр батлах, хэлэлцэх үйл явцад монголын хуульчдын оролцоо болон Эрүүгийн хуулийг буцаан хэрэглэхтэй холбоотой асуудалд Монголын Хуульчдын Холбооны байр суурь болон цаашид энэ чиглэлээр хэрхэн хамтран ажиллах талаар ярилцлаа.

     Ян Ветцел нь 20 гаруй жилийн туршлагатай, олон улсын эрх зүйгээр мэргэшсэн судлаач бөгөөд өдгөө Эмнести Интернэшнлд 12 дахь жилдээ ажиллаж байгаа ажээ.Тэрбээр ХБНГУ-ын Кёльны Их Сургуулийн Европын болон Олон Улсын хамтын ажиллагааны эрх зүйн төв, Боннын Их Сургуулийн Олон улсын эрх зүйн төвд судлаачаар, Хонг Конгийн Сити Их Сургуулийн зочин судлаачаар, мөн ИБУИНВУ-ын Линкольний Их Сургуульд хуулийн ахлах багшаар ажиллаж байсан олон улсын эрх зүйн салбарт арвин туршлагатай мэргэжилтэн юм.