Монголын Хуульчдын холбооны Эвлэрүүлэн зуучлалыг дэмжих асуудал эрхэлсэн хорооноос гишүүдээ идэвхжүүлэх, хорооны үйл ажиллагааг таниулах зорилгоор нийт гишүүдийнхээ дунд нээлттэй өдөрлөгийг өнгөрсөн бямба гарагт анх удаа зохион байгууллаа.

Өдөрлөгийг Монголын Хуульчдын холбооны Ерөнхийлөгч П.Одгэрэл нээж, Эвлэрүүлэн зуучлалыг дэмжих хороо нь идэвхтэй үйл ажиллагаа явуулж буй талархал илэрхийлсэн. Мөн өдөрлөгийг нээж, Олон Улсын эрх зүйн хөгжлийн байгууллагын Суурин төлөөлөгч Чарльз Болланд, ШЕЗ-ийн Зуучлагчдын зөвлөлийн дарга Т.Болормаа нар үг хэлсэн бөгөөд Монгол Улсад эвлэрүүлэн зуучлалыг хөгжүүлэхэд тус хорооны гишүүдийн идэвх оролцоо, санаачилга чухал байгааг онцолсон юм.

Өдөрлөгийг Эвлэрүүлэн зуучлалыг дэмжих асуудал эрхэлсэн хорооны Тэргүүн Д.Түмэнжаргал чиглүүлж явуулсан бөгөөд тэрбээр “Эвлэрүүлэн зуучлалын тухай хуулийн шинэчилсэн найруулгын төсөлд тусгагдсан хувийн эвлэрүүлэн зуучлалын шинэчлэл” сэдвээр гишүүдэд мэдээлэл өгч, сонирхсон асуултад хариуллаа.

Энэ удаагийн өдөрлөгийг Олон Улсын эрх зүйн хөгжлийн байгууллага хамтран явуулж, тус байгууллагын Төслийн зохицуулагч С.Агьзул “Монгол Улсад арилжааны эвлэрүүлэн зуучлалыг бэхжүүлэх нь” төслийн товч танилцуулгыг хийхийн зэрэгцээ төслийн сургагч багш З.Тунгалагмаа, Д.Түмэнжаргал, Ч.Анар нар оролцогчдод зориулж, “Why mediation? Хуульч нарт эвлэрүүлэн зуучлал яагаад чухал ач холбогдолтой вэ?” сэдвээр ворк шоп явуулсан юм.

Мөн өдөрлөгийн хүрээнд тус төслийн үндэсний зөвлөх, сургагч багш, Баянгол, Хан-Уул, Сонгинохайрхан дүүргийн Эрүүгийн хэргийн анхан шатны тойргийн шүүхийн шүүгч Ц.Мөнх-Эрдэнэ  “Сингапур Улсын эрүү болон зөрчлийн хэрэгт эвлэрүүлэн зуучлах ажиллагааг нэвтрүүлсэн туршлага” сэдвээр сонирхолтой мэдээлэл хуваалцсан.

Түүнчлэн Эвлэрүүлэн зуучлалыг дэмжих хорооны Удирдах зөвлөлийн гишүүн Ц.Амарсанаа “Хувь хүний хөгжил” сэдэвт лекц орсонд оролцогчид талархан хүлээж авлаа.

Энэ удаагийн өдөрлөг мэдээлэл сайтай, гишүүдийн оролцоо ихтэй, ач холбогдолтой болсны зэрэгцээ гишүүдийн дунд хөгжөөнт тэмцээн зохион байгуулж, амралтын нэг өдрийг үр дүнтэй, зугаатай өнгөрүүлсэнд оролцогчид сэтгэл хангалуун байлаа.

Тус өдөрлөгийг зохион байгуулахад идэвх санаачилгатай ажилласан хорооны Удирдах зөвлөлийн гишүүд, хорооны гишүүн хуульчид, Шүүхийн Ерөнхий зөвлөлийн дэргэдэх Эвлэрүүлэн зуучлах зөвлөл, Олон Улсын эрх зүйн хөгжлийн байгууллага (IDLO)-ын төлөөлөл болон амралтын өдрөөрөө цаг зав гарган хүрэлцэн ирсэн нийт оролцогчдодоо талархал илэрхийлж, ажлын амжилт хүсье.