Монголын Хуульчдын холбооны Ерөнхийлөгч М.Мөнхбатын Сингапур Улсад хийсэн албан айлчлал амжилттай болж өндөрлөлөө.

Айлчлалын хүрээнд Монголын Хуульчдын холбоо нь Сингапурын Хуульчдын холбоо (The Law Society of Singapore) болон “SAGE Mediation” эвлэрүүлэн зуучлалын төвтэй Харилцан ойлголцлын санамж бичиг байгуулж, хоёр улсын хуульчдын мэргэжлийн хамтын ажиллагааг өргөжүүлэх, харилцан туршлага, мэдлэг мэдээлэл солилцох, эвлэрүүлэн зуучлалын чиглэлээр хамтын ажиллагааг хөгжүүлэх чиглэлээр тохиролцов.

Мөн айлчлалын баг Сингапур Улсын Дээд шүүх болон Singapore University of Social Sciences (SUSS)-ийн үйл ажиллагаа, сургалт, эрх зүйн боловсролын орчинтой танилцаж, тус байгууллагуудын туршлага, үйл ажиллагааны талаар мэдээлэл солилцлоо.

Түүнчлэн айлчлалын үеэр Сингапур Улсад зохион байгуулагдаж буй олон улсын “Singapore Convention Week 2026” үйл ажиллагаанд Монголын Хуульчдын холбооны төлөөлөл оролцож, олон улсын худалдааны маргаан шийдвэрлэлт, эвлэрүүлэн зуучлалын өнөөгийн хөгжил, практик туршлагын талаарх хэлэлцүүлэг болон бусад үйл ажиллагаанд оролцож, Монгол Улсын эвлэрүүлэн зуучлалын тогтолцоо, практик болон цаашдын хөгжлийн талаар өөрсдийн туршлага, байр суурийг хуваалцав.

Энэхүү албан айлчлалыг зохион байгуулах, хэрэгжүүлэхэд дэмжлэг үзүүлж, хамтран ажилласан Монголын Хуульчдын холбооны Тамгын газар, Эвлэрүүлэн зуучлалыг дэмжих хорооны тэргүүн Д.Түмэнжаргал,

тус хорооны Удирдах зөвлөлийн гишүүн Ц.Мөнх-Эрдэнэ, Э.Цолмон. Ц.Санжаалхам, С.Уянга, С.Отгонгэрэл, В.Болормаа, Олон Улсын эрх зүйн хороон Тэргүүн Э.Алимаа нарт талархал илэрхийлж, ажлын амжилт хүсье.

Цаашид санамж бичгийн хүрээнд хамтын ажиллагааг бодит ажил хэрэг болгон хөгжүүлж, хоёр улсын хуульчдын мэргэжлийн харилцаа, мэдлэг, туршлага солилцоог улам өргөжүүлэх болно.