Монголын Хуульчдын холбооны гишүүдийн Сингапур Улсад хийж буй албан айлчлал үргэлжилж байна.

Айлчлалын хүрээнд Монголын Хуульчдын холбооны Эвлэрүүлэн зуучлалыг дэмжих хорооны Удирдах зөвлөлийн гишүүн, шүүгч Ц.Мөнх-Эрдэнэ “Singapore Convention Week”-ийн хүрээнд зохион байгуулагдсан “Building Trust in Commercial Dispute Resolution” сэдэвт хэлэлцүүлэгт оролцож, Монгол Улсын эвлэрүүлэн зуучлалын тогтолцоо, практик болон цаашдын хөгжлийн талаар илтгэл хэлэлцүүллээ.

Тус хэлэлцүүлэгт Сингапур болон БНХАУ-ын хууль зүй, эвлэрүүлэн зуучлалын салбарын нэр хүндтэй мэргэжилтнүүд оролцож, арилжааны маргааныг шүүхийн бус аргаар, харилцан итгэлцэлд тулгуурлан шуурхай, үр дүнтэй шийдвэрлэх, түүнчлэн Азийн орнуудын хоорондын хамтын ажиллагааг өргөжүүлэх боломжийн талаар мэргэжил нэгт хуульч нартай санал солилцсон юм.

Тус үйл ажиллагааг Сингапурын Хуульчдын холбоо (The Law Society of Singapore) болон БНХАУ-ын Шанхай хотын эвлэрүүлэн зуучлал, олон улсын арилжааны маргаан шийдвэрлэх чиглэлийн байгууллагууд хамтран зохион байгуулсан бөгөөд Азийн орнуудын эвлэрүүлэн зуучлалын практик, арилжааны маргаан шийдвэрлэх тогтолцоо, талуудын хоорондын итгэлцлийг бэхжүүлэх боломжийн талаар хэлэлцсэнээрээ онцлог байлаа.