Монголын Хуульчдын холбооны Захиргааны эрх зүйн хорооноос зохион байгуулдаг "Миний дуртай захиргааны эрх зүй" цуврал уулзалтын хүрээнд  "Шударга бус хуулийг үл тэвчих зарчим" сэдэвт өглөөний уулзалтыг 2025 оны 03 дугаар сарын 14-ний өдөр  зохион байгууллаа. Тус уулзалтын панелистаар Нийслэл дэх Захиргааны хэргийн анхан шатны шүүхийн шүүгч, Захиргааны эрх зүйн хорооны тэргүүн Т.Мөнх-Эрдэнэ оролцсон. 

Тэрбээр тус сэдвийн хүрээнд хууль Үндсэн хуульд нийцсэн байх, шударга ёсны үнэлэмжид нийцсэн байх тухай сонирхолтой агуулгыг хөндөж, Радбрухын формула хэмээх эрх зүйн онол, эрх зүйн философийн чухал ойлголтыг тайлбарлан, шүүхээс Үндсэн хуульд нийцсэн хуулийг хэрэглэх, хууль Үндсэн хуульд нийцсэн эсэхийг ямар шалгуураар хэрхэн тогтоох, Үндсэн хуулийн тодорхой хяналтын механизмд шүүхийн үүрэг, оролцоо ямар байдаг тухай зарчмын асуудлуудыг тайлбарлан ярилцсан юм.