Монголын Хуульчдын холбооны Зөвлөлөөс энэ жилийн хуульчийн мэргэжлийн шалгалтыг 2025 оны аравдугаар сарын 22-24-ний өдрүүдэд Улаанбаатар хотод зохион байгуулахаар товлосон.

   Шалгалтын товыг шалгалт эхлэхээс 75-аас доошгүй хоногийн өмнө хэвлэл мэдээллийн хэрэгслээр нийтэд зарлахаар хуульд заасны дагуу Монголын Хуульчдын холбооноос өнөөдөр(2025.07.03) хэвлэлийн бага хурал зохион байгуулж, мэдээлэл өглөө. 

    Хуульчийн мэргэжлийн шалгалт нь хуульчийн мэргэжлийн үйл ажиллагаа эрхлэх зөвшөөрөл авахыг хүссэн этгээдийн шүүх эрх мэдлийг хэрэгжүүлэх, шүүн таслах ажиллагаанд оролцох, хууль зүйн туслалцаа үзүүлэх хангалттай мэдлэг, чадвар эзэмшсэн эсэхийг тогтоох зорилготой бөгөөд тус шалгалтад эрх зүйч мэргэжлээр бакалаврын боловсрол эзэмшиж, хоёр жилийн хугацаанд мэргэжлийн дадлага хийсэн хүмүүс оролцох эрхтэй байдаг.

   Тус шалгалт нь эрх зүйн ерөнхий мэдлэгийг сорьсон сорилгын болон эрх зүйн салбарын хүрээнд тодорхой тохиолдлыг хууль хэрэглэж шийдвэрлэх бодлогын шалгалтын хэлбэрээр зохион байгуулагддаг билээ.

   Шалгалтын бүртгэл https://burtgel.mglbar.mn/ хаягаар явагдах бөгөөд 2025 оны наймдугаар сарын 08-ны өдөр эхэлж, 2025 оны есдүгээр сарын 21-ний өдрийн 24:00 цагт хаагдана.

   Шалгалтад оролцогчдод зориулсан бодлого бодох аргачлалын сургалт 2025 оны есдүгээр сарын 01-ний өдрөөс 2025 оны аравдугаар сарын 04-ний өдөр хүртэл 5 долоо хоног үргэлжилнэ.

  Сонирхуулахад, 2022 онд 1228 иргэн шалгалтад оролцсоноос 371 нь, 2023 онд 1200 иргэн шалгалтад оролцсоноос 203 нь, 2024 онд 1146 хүн шалгалт өгснөөс 205 нь тэнцэж, хуульчийн мэргэжлийн үйл ажиллагаа эрхлэх зөвшөөрөл авсан байдаг.

Хэвлэлийн бага хурлын бүтэн бичлэгийн ЭНД дарж үзнэ үү.