Өмгөөллийн “Эл Би Партнерс” ХХК, “Инвескор лизинг” ХХК, “UA Properties” ХХК, БНСУ дахь Хөдөлмөр нийгмийн хамгааллын үйлчилгээний төв хамтран Бүгд Найрамдах Солонгос Улсад оршин суугаа Монгол Улсын иргэдэд зориулсан “Зөвлөх үйлчилгээний өдөрлөг”-ийг 2023 оны 04 дүгээр сарын 16-ны өдөр зохион байгуулах гэж байна. 

Уг өдөрлөгт Монгол Улсаас БНСУ-д суугаа Элчин сайдын яамны 3 дугаар нарийн бичгийн дарга Г.Оюун-Эрдэнэ зочиноор оролцох бөгөөд өдөрлөгийн үеэр өмгөөллийн “Эл Би Партнерс” ХХК-ийн хуульч, өмгөөлөгч нар Монгол Улсын хууль эрх зүйн хүрээнд зөвөлгөө өгөх бол БНСУ-ын өмгөөлөгч нар тус улсын хууль, эрх зүйн хүрээнд зөвлөгөө өгнө. 

Иргэдийн дунд явуулсан судалгаагаар тухайн улсад ажиллаж, амьдарч буй Монгол иргэд “эрүүгийн хэрэг, хөдөлмөрийн болон гэр бүлийн хэрэг маргаан, виз, оршин суух зөвшөөрөл” зэрэг асуудлаар хууль зүйн зөвөлгөө авах сонирхолтой байгаагаа илэрхийлсэн тул өдөрлөг зохион байгуулагчдын зүгээс энэ чиглэлд түлхүү анхаарч, хоёр улсын хууль тогтоомжийн хүрээнд зохих туслалцаа, мэдлэг, мэдээллийг өгөхөөр ажиллаж байна.   

Түүнчлэн энэхүү өдөрлөгийн үеэр БНСУ дахь Хөдөлмөр нийгмийн хамгааллын үйлчилгээний төвийнхөн “тус улсад хөдөлмөрийн гэрээний үндсэн дээр хөдөлмөр эрхлэж байгаа Монгол иргэддээ зөвлөгөө, мэдээлэл өгөх” бол “Инвескор лизинг” ХХК-иас лизингийн үйлчилгээ үзүүлэх, “UA Properties” ХХК үл хөдлөх эд хөрөнгийн талаар мэдээлэл зөвөлгөө өгөх, гэрээ хэлцэл байгуулах зэрэг үйлчилгээг тус тус үзүүлнэ. 

Өдөрлөгт БНСУ-ын шүүх, прокурор, цагдаад орчуулга хийх эрхтэй мэргэшсэн орчууллагч оролцох юм байна.