Монголын Хуульчдын холбооны Төлбөрийн чадваргүй иргэнд хууль зүйн туслалцаа, өмгөөллийн үйлчилгээ үзүүлэх асуудал эрхэлсэн хороо, Хүүхдийн эрхийн дэд хороо, Хүний эрхийн Үндэсний Комисстой хамтран байгуулсан санамж бичгийн хүрээнд Хүүхдийн эрхийн чиглэлээр ажилладаг алба хаагчид, мэргэжилтэн, нийгмийн ажилтан, хуульч, өмгөөлөгч нарыг чадавхижуулах, хүүхдийн эрх хамгааллын чиглэлээр төрөөс баримталж буй бодлого, эрх зүйн дүрэм журам, стандартын талаар нэгдсэн мэдээ мэдээллийг түгээх сургалтыг зохион байгууллаа.
Дэлхийн Хүүхдийн эрхийн өдрийг угтан "Хүүхдийн эрхийн салбар бүрийн мэргэжилтнүүдийн нэгдсэн сургалтыг МХХ-ны Төлбөрийн чадваргүй иргэнд хууль зүйн туслалцаа, өмгөөллийн үйлчилгээ үзүүлэх асуудал эрхэлсэн хорооны тэргүүн Р.Булгамаа болон Хүүхдийн эрхийн дэд хорооны зохицуулагч М.Хандармаа нар хамтран зохион байгуулж, "Хэрэг хянан шийдвэрлэх ажиллагаан дахь Хүүхдийн эрхийн хамгааллын тулгамдсан асуудал" сэдвээр илтгэл хэлэлцүүллээ.
Хүний эрхийн ойлголтыг бэхжүүлэх, хүний эрхэд суурилсан хандлагыг төлөвшүүлэх үүднээс Хүүхдийн эрхийн мэргэшсэн хуульч өмгөөлөгчийг бэлтгэх, мэргэшүүлэх нь чухал ажлын нэг юм.
Тус сургалтанд Хүүхдийн эрхийн чиглэлээр ажилладаг цагдаагийн алба хаагчид, мэргэжилтэн, нийгмийн ажилтан, сэтгэл зүйчдээс гадна 20 гаруй хуульч, өмгөөлөгч хамрагдсан бөгөөд Хүүхдийн эрхийн Иргэний нийгмийн байгууллагууд, Монгол Улсын Хүний эрхийн Үндэсний Комисс, Монголын Хуульчдын холбоо, Цагдаагийн байгууллагууд оролцлоо.
