Монголын Хуульчдын холбооны Иргэний эрх зүйн хорооноос 2024 оны 02 дугаар сарын 22-ны өдөр “Арилжааны хууль” сэдвээр хэлэлцүүлэг зохион байгууллаа.

Хууль зүй, дотоод хэргийн яам Арилжааны хуулийн төслийг боловсруулсан бөгөөд Арилжааны хуулийн төслөөс “арилжааны төлөөлөл” болон “арилжааны нэр”-ний зохицуулалтыг тухайлан хэлэлцлээ.  Хэлэлцүүлэг нь илтгэл болон хэлэлцүүлэг гэсэн хоёр хэсэгтэй зохион байгуулагдсан.

Хэлэлцүүлгийн илтгэлийн хэсэгт “Арилжааны хуулийн зохицуулалтын хүрээ: арилжааны нэр, төлөөллийн тусгайлсан зохицуулалт” сэдвээр ХЗДХЯ-ны Хувийн эрх зүйн хэлтсийн дарга Н.Жамъянхүү (LLM), “Арилжааны төлөөллийн ойлголт, түүний зохицуулалт” сэдвээр МУИС-ийн ХЗС-ийн багш, Иргэний эрх зүйн хорооны Удирдах зөвлөлийн гишүүн, хууль зүйн доктор Г.Давааням (LL.D), “Арилжааны нэрийн ойлголт, түүний зохицуулалт” сэдвээр МУИС-ийн ХЗС-ийн багш Н.Норовсамбуу (LL.M) нар тус тус илтгэл хэлэлцүүлсэн.

Хэлэлцүүлгийн хэсэгт панелистаар УДШ-ийн шүүгч, хууль зүйн доктор Н.Баярмаа (LL.D), ХЗДХЯ-ны Хувийн эрх зүйн хэлтсийн дарга Н.Жамъянхүү (LL.M), ХЗҮХ-ийн Эрдэмтэн нарийн бичгийн дарга, хууль зүйн доктор М.Түвшинжаргал (Ph.D),  МУИС-ийн ХЗС-ийн багш, Иргэний эрх зүйн хорооны Удирдах зөвлөлийн гишүүн, хууль зүйн доктор Г.Давааням (LL.D) нар оролцож, оролцогчдын сонирхсон асуудлаар судлаачийн үзэл бодлоо чөлөөтэй илэрхийлж, сонирхолтой хэлэлцүүлгийг өрнүүлсэн.

Хэлэлцүүлэгт оролцогчид энэхүү хэлэлцүүлэг нь цаг үеэ олсон, ач холбогдол бүхий сэдвийг сонгосон талаар онцлон тэмдэглэж, цаашид “Арилжааны эрх зүй”-н хэлэлцүүлгийг үргэлжлүүлэн зохион байгуулах санал хүсэлтээ илэрхийлж байв.

Хуульчдаас гаргасан саналыг нэгтгэн цуврал хэлэлцүүлгийг зохион байгуулах болно.