Монголын Хуульчдын холбооны Тамгын газрын дарга Ш.Жолбарс, Хөх хотын Хуульчдын холбооны Ерөнхийлөгч Ван Тянган нар 2024 оны 09 дүгээр сарын 14-ний өдөр хамтран ажиллах санамж бичигт гарын үсэг зурж баталгаажууллаа
Санамж бичгийн хүрээнд талууд хамтарсан судалгаа, эрдэм шинжилгээний хурал, зөвлөгөөн зохион байгуулах, харилцан туршлага солилцох, хуульчдыг чадавхжуулах, тусгай богино хугацааны төсөл хэрэгжүүлэх зэрэг чиглэлээр хамтран ажиллах юм.
Мөн энэ үеэр манай улсын өмгөөллийн “Арвай тамга” нөхөрлөл Хятад улсын “Зэ Мин” хуулийн компанитай хамтран ажиллах санамж байгуулсан бөгөөд Хятад болон Монголын хөрөнгө оруулагч нарт хууль зүйн туслалцаа үйлчилгээ үзүүлэхэд хамтран ажиллахаар болсон.
Тус санамж бичиг зурах ёслолын ажиллагаанд Монголын Хуульчдын холбооны Зөвлөлийн гишүүн, Хууль зүйн шинжлэх ухаан боловсролын хөгжлийг дэмжих асуудал эрхэлсэн хорооны дарга Ц.Мөнхбат, Монголын Хуульчдын холбооны гишүүн хуульч, "Арвай тамга" ХХН-ийн захирал Б.Сүрэнхүү болон Хөх хотын Хууль зүйн товчооны орлогч дарга Гао Юань, Хөх хотын Хууль зүйн товчооны Хуульчийн ажлын албаны дарга, Хотын хуульчдын холбооны ерөнхий нарийн бичгийн дарга Жао Аньин, Хотын Хуульчдын холбооны дэд ерөнхийлөгч Бай Баатар, Хөх хотын Хуульчдын холбооны дэд ерөнхийлөгч Ю Тиан бяо нарын төлөөлөл оролцсон.
