Монголын Хуульчдын холбооны Ерөнхийлөгч М.Мөнхбат, Татварын ерөнхий газрын дарга Б.Цогтнаран нар өнөөдөр (2026 оны 10 дугаар сарын 07) хамтран ажиллах санамж бичигт гарын үсэг зурж баталгаажууллаа.

Энэхүү санамж бичиг нь талуудын хамтын ажиллагааг өргөжүүлэх, татварын эрх зүйн мэргэшсэн хуульчдыг бэлтгэх, татварын байгууллагын албан хаагчдын мэргэжлийн мэдлэг, ур чадварыг дээшлүүлэх, татварын хууль тогтоомжийн хэрэгжилтийг хангахад дэмжлэг үзүүлэх, татварын чиглэлээр мэргэшсэн хүний нөөцийг бэлтгэх, чадавхжуулахад чиглэж буй юм.

Хамтын ажиллагааны хүрээнд талууд:

-сургалт, семинар, хэлэлцүүлэг зохион байгуулах, хүний нөөцийг чадавхжуулах;

-татварын чиглэлээр мэргэшсэн хуульч, сургагч багш бэлтгэх;

-хууль тогтоомж, дүрэм, журам боловсруулахтай холбоотой мэргэжлийн сургалт, хэлэлцүүлэг зохион байгуулах;

-татварын байгууллагын албан хаагч, татварын улсын байцаагчдыг мэргэшүүлэх, чадавхжуулах дотоодын болон олон улсын сургалтад хамруулах;

-татварын хууль тогтоомжийн хэрэгжилттэй холбоотой эрх зүйн асуудлаар мэргэжлийн зөвлөгөө, мэдээлэл, дэмжлэг үзүүлэх;

-татварын эрх зүйн чиглэлээр мэдлэг, туршлага солилцох, мэргэжлийн хамтын ажиллагааг хөгжүүлэх зэрэг ажлыг хэрэгжүүлэхээр тохиролцлоо.