Монголын Хуульчдын холбооны Ерөнхийлөгч П.Одгэрэл, Тамгын газрын дарга Ш.Жолбарс, Гадаад харилцаа, хамтын ажиллагааны зөвлөх Ц.Одонжав, Эвлэрүүлэн зуучлалыг дэмжих асуудал эрхэлсэн хорооны тэргүүн Д.Түмэнжаргал нар Олон Улсын эрх зүйн хөгжлийн байгууллагын суурин төлөөлөгч Чарльз Болланд, Төслийн менежер Н.Одонтуяа, зохицуулагч С.Агьзул нартай 2025 оны дөрөвдүгээр сарын 03-ны өдөр уулзлаа.
Жендерт суурилсан хүчирхийлэлтэй тэмцэх үйл ажиллагааг бэхжүүлэх төслийг 2019-2023 оны хооронд хэрэгжүүлсэн бөгөөд Монголын Хуульчдын холбоо нь хамтын ажиллагааны хүрээнд гэр бүлийн хүчирхийлэлд өртсөн хохирогчдын эрхийг хамгаалах, гэр бүлийн хүчирхийлэл үйлдэх гэмт хэргийг хянан шийдвэрлэхэд өмгөөлөгчийн чадвар, мэдлэгийг нэмэгдүүлж, энэ чиглэлээр мэргэшсэн өмгөөлөгч-сургагч багш бэлтгэх чиглэлээр олон ажлыг хэрэгжүүлсэн байдаг.
"Монгол Улсад жендерт суурилсан хүчирхийлэлтэй тэмцэх үйл ажиллагааг бэхжүүлэх” төслийн хоёр дахь шатыг Канад Улсын Засгийн газрын санхүүжилтээр 5 жилийн хугацаанд хэрэгжүүлэхээр баталсан бөгөөд төслийн хүрээнд нөхцөл байдлын судалгаа, үнэлгээ хийх, шүүх, прокурор, цагдаа зэрэг байгууллагын ажилтнуудад онцлон сэтгэл зүйн чиглэлтэй сургалт зохион байгуулах, гэр бүлийн хүчирхийлэлтэй холбоотой иргэдэд чиглэсэн үйлчилгээ үзүүлэх, орон нутагт явуулын үйлчилгээ хүргэх зэрэг ажлуудыг төлөвлөжээ.
Монголын Хуульчдын холбоо нь тус төслийн хүрээнд гэр бүлийн хүчирхийлэлтэй тэмцэх үйл ажиллагаанд хохирогч төвтэй хандлагыг төлөвшүүлэх, жендерт суурилсан хүчирхийлэлтэй тэмцэхэд хуульчдын ур чадвар, ойлголтыг нэмэгдүүлэх чиглэлээр хамтарч ажиллахаар боллоо.
