Олон Улсын ахмадын өдрийг тохиолдуулан Монголын Хуульчдын холбооны Тамгын газар болон Ахмадын хорооноос ахмад хуульчдын төлөөлөлд хүндэтгэл үзүүллээ.

Хүндэтгэл үзүүлэх үйл ажиллагаанд Монголын Хуульчдын холбооны Ерөнхийлөгч М.Мөнхбат, Тамгын газрын дарга Ш.Жолбарс, Ахмадын хорооны тэргүүн Ц.Мөнхбат нар оролцож, ахмад хуульчдадаа эрүүл энх, аз жаргал, урт удаан наслахын ерөөлийг дэвшүүлж, тэдний хөдөлмөр зүтгэл, мэргэжлийн арвин туршлага, үнэтэй зөвлөгөө, сургамжийг залуу үеийн хуульчдад өвлүүлэн үлдээж буйд талархал илэрхийллээ.

Монголын Хуульчдын холбооны Зөвлөлийн хурлаар Ахмадын хороо байгуулах тогтоол гаргасан бөгөөд тус хороо нь ахмад хуульчдадаа хүндэтгэл үзүүлэх ажлыг санаачлан анхны ажлаа хэрэгжүүллээ.

Монголын Хуульчдын холбоонд нийт 6646 хуульч бүртгэлтэй байгаагаас 55-аас дээш настай эмэгтэй 718 хуульч, 60-аас дээш настай эрэгтэй 319 хуульч байна.

Хууль зүйн салбарын хөгжил, төлөвшилд үнэтэй хувь нэмрээ оруулж, олон жилийн хөдөлмөр, мэдлэг, туршлагаа зориулсан ахмад хуульчид бол өнөөдрийн хууль зүйн салбарын хөгжил дэвшлийн үндэс суурийг бүрдүүлсэн эрхэм хүмүүс билээ.

Ахмад хуульчдадаа Ахмадын баярын мэнд хүргэж, эрүүл энх, аз жаргал, сайн сайхан бүхнийг хүсэн ерөөе.