Монголын Хуульчдын Холбооны Иргэний эрх зүйн хороо, өмгөөллийн “Легал гайд” хуулийн фирм хамтран зохион байгуулах “Цахим шүүх Mock Trial – 2025” иргэний хэргийн шүүхийн мэтгэлцээний техникийн зөвлөгөөн өнөөдөр (2025.05.08) боллоо. Шүүх эрх мэдлийн байгууллагуудын цахимжилтын энэ цаг үед анх удаа цахим хэлбэрээр зохион байгуулагдах “Цахим шүүх Mock Trial – 2025” иргэний хэргийн шүүхийн мэтгэлцээнд нийт 8 сургуулийн 12 баг оролцохоор мэдүүлгээ ирүүлсэн.

Техникийн зөвлөгөөнөөр “Цахим шүүх Mock Trial-2025” иргэний хэргийн шүүхийн мэтгэлцээний дүрмийг баталж, тоглох оноолтоо тодруулж, мэтгэлцээний хэргээ багууд хүлээн авлаа.

Мэтгэлцээний хэргээр зээлийн гэрээ, тээвэрлэлтийн гэрээ, орон сууц зээлээр худалдах, худалдан авах гэрээ болон концессын гэрээтэй холбоотой маргаанууд сонгогдсон байна.

Мэтгэлцээний эхний хоёр шатны тоглолт анхан шатны шүүхэд хэрэг хянан шийдвэрлэх ажиллагааны журмаар цахимаар явагдах бөгөөд медалийн төлөөх тоглолтууд давж заалдах шатны шүүхэд хэрэг хянан шийдвэрлэх журмаар танхимаар явагдана.

Энэ удаагийн шүүхийн мэтгэлцээн бол ирээдүйн цахим шүүхийн орчинд мэргэжлийн түвшинд оролцох анхны бодит алхам болно.

Цааснаас ангид, дижитал орчинд мэтгэлцэх шинэ сорилт ирж байна. Хэрэг материалыг цаасгүй, цахим хэлбэрээр унших, нотлох баримтыг дижитал орчинд судалж, мэтгэлцээнээ онлайнаар явуулах бодит практик болох юм.

“Цахим шүүх Mock Trial-2025” иргэний хэргийн шүүхийн мэтгэлцээнд оролцогч оюутнууддаа амжилт хүсье.