Захиргааны эрх зүйн хорооноос зохион байгуулдаг "Миний дуртай захиргааны эрх зүй" цуврал уулзалтыг "ЗЕХ §103: Монгол ба Герман /концепцийн харьцуулалт/” сэдвээр 2026 оны 02 дугаар сарын 26-ны өдөр зохион байгууллаа.
Тус уулзалтын панелистаар Захиргааны эрх зүйн хорооны тэргүүн, Нийслэл дэх Захиргааны хэргийн анхан шатны шүүхийн Ерөнхий шүүгч Т.Мөнх-Эрдэнэ оролцов.
Тус сэдвийн хүрээнд Захиргааны ерөнхий хуулийн 10 дугаар бүлэгт зохицуулагдсан 101, 103 дугаар зүйлийн шаардах эрхүүд, хэм хэмжээний урьдчилсан нөхцөлүүдийг ХБНГУ-ын холбогдох хууль тогтоомж, тус улсын төрийн хариуцлагын эрх зүйн онолын түүхэн уг сурвалжтай харьцуулан судалсан үр дүнгээ хуваалцаж, төрийн хариуцлагын эрх зүйн тухай ойлголт, албан хаагчийн хариуцлагын загвар, төр хариуцах загвар, албаны хариуцлагын загвар, зэрэгцээ буюу кумулятив загварыг тайлбарлан, цаашид шүүхийн хууль хэрэглээнд анхаарах асуудлуудын талаар захиргааны эрх зүйн чиглэлээр ажиллаж буй хуульч, судлаач, эрх зүйч нартай сонирхолтой яриа өрнүүлэв.
