Монголын Хуульчдын холбооны урилгаар Пенсилванийн их сургуулийн Хуулийн сургуулийн профессор The Hon. Самуэл Л.Баффорд, профессор Жули М.Метцгер нар 2015 оны арванхоёрдугаар сарын 11-17-ны өдрүүдэд манай улсад айлчилж байна. Тэднийг өнөөдөр Монголын Хуульчдын холбооны Ерөнхийлөгч Б.Гүнбилэг хүлээн авч уулзаж, цаашдын хамтын ажиллагааны талаар ярилцлаа.

   Профессор Самуэл Л.Баффорд нь АНУ-ын төлбөрийн чадваргүйдлийн харьцуулсан эрх зүйн тэргүүлэх эрдэмтдийн нэгт зүй ёсоор тооцогддог бөгөөд дампуурал, олон улсын болон харьцуулсан төлбөрийн чадваргүйдлийн зохицуулалт, арилжааны хэлцэл, олон улсын бизнесийн хэлцлийн чиглэлээр лекц уншдаг. Тэрбээр АНУ-ын Калифорни мужийн Төвийн дүүрэгт Нэгдсэн Улсын Дампуурлын шүүгчээр 25 жил ажиллаж, 120 000 орчим хэргийг шийдвэрлэжээ. Харин профессор Жули Метцгерийн хувьд худалдааны эрх зүй, олон улсын болон харьцуулсан банкны эрх зүйгээр судалгаа хийдэг бөгөөд “City National Bank”, CIT группийн ахмад консулын хувьд худалдааны зээл, хяналт, аудит, санхүүгийн үйл ажиллагааны чиглэлээр багшилдаг ажээ.

   Профессор Самуэл Л.Баффорд, Жули М.Метцгер нарын манай улсад зочилж буй гол зорилго нь олон улсын бизнесийн эрх зүй, худалдааны эрх зүй, нотлох баримтын эрх зүй, барьцаат гүйлгээний эрх зүйн талаар өөрсдийн мэдлэг, туршлагыг Монголын хуульчдад хуваалцах юм. Тэдний сургалт өнөөдөр “Нотлох баримтын эрх зүй”, “Олон улсын бизнесийн гүйлгээний эрх зүй” сэдвээр Хуульчдын танхимд эхэлсэн бөгөөд Монголын Хуульчдын холбооны гишүүн 100 гаруй хуульч тус сургалтад хамрагдахаар бүртгүүлээд байна.

   Дашрамд дурдахад, профессор Самуэл Л.Баффорд, Жули М.Метцгер нарын сургалтын дээрх дөрвөн сэдвийг Хуульчдын холбооны Сургалтын хорооноос магадлан итгэмжлэсэн бөгөөд сургалтад хамрагдсан хуульчдыг дөрвөн багц цаг хангасанд тооцох юм.