Монголын Хуульчдын холбооны Тамгын газрын Бодлого зохицуулалтын хэлтсийн мэргэжилтэн Б.Төрбат нь иргэний хувиар Шүүгчийн эрх зүйн байдлын тухай хуулийн 15 дугаар зүйлийн 15.2 дахь хэсэгт “Ерөнхийлөгч Шүүхийн ерөнхий зөвлөлөөс санал болгосон нэр дэвшигчийг судлан үзэж, түүнийг томилох буюу томилохоос татгалзах шийдвэрийн аль нэгийг гаргана” гэж заасан нь Монгол Улсын Үндсэн хуулийн Тавин нэгдүгээр зүйлийн 2 дахь хэсэгт “Шүүхийн ерөнхий зөвлөлөөс Улсын дээд шүүхийн шүүгчдийг Улсын Их Хуралд танилцуулснаар, бусад шүүхийн шүүгчдийг Шүүхийн ерөнхий зөвлөлийн санал болгосноор тус тус Ерөнхийлөгч томилно” гэж заасныг зөрчсөн гэх үндэслэлээр 2015 оны 11 дүгээр сарын 16-ны өдөр Үндсэн хуулийн цэцэд мэдээлэл гаргасан билээ.

Дээрх агуулга бүхий мэдээллийг урьдчилан шалгаад, Монгол Улсын Үндсэн хуулийн Цэцийн гишүүний 2015 оны 12 дугаар сарын 07-ны өдрийн 141 дүгээр тогтоолоор Үндсэн хуулийн цэцэд маргаан хянан шийдвэрлэх ажиллагаа үүсгэхээс татгалзсан хариуг өгсөн байна.

Иймд тэрбээр Үндсэн хуулийн цэцэд маргаан хянан шийдвэрлэх ажиллагааны тухай хуулийн 21 дүгээр зүйлийн 4 дэх хэсэгт заасныг үндэслэн Цэцийн гишүүний тогтоолд гомдол гарган, маргаан хянан шийдвэрлэх ажиллагаа үүсгэх эсэх асуудлыг шийдвэрлүүлэхээр Монгол Улсын Үндсэн хуулийн Цэцийн даргад ханджээ.