ХБНГУ-ын Хайдельберг хот дахь “Макс-Планкийн сан”-гийн Олон улсын энхийг сахих, эрх зүйт төрийн бодлогын асуудал хариуцсан гүйцэтгэх захирал, доктор, профессор Рүдигэр Волфрумтай (Rüdiger Wolfrum) Монголын Хуульчдын холбооны Ерөнхийлөгч Б.Гүнбилэг 2016 оны нэгдүгээр сарын 12-ны өдөр уулзлаа.

        Уулзалтын үеэр тус сан болон Монголын Хуульчдын холбоо цаашид хамтран ажиллах тал дээр санал солилцсон бөгөөд профессор Рүдигэр Волфрумын лекцийг видео хэлбэрээр Хуульчдын холбооны үргэлжилсэн сургалтад ашиглахаар тохиролцов. Мөн цаашид Монгол Улсад шударга шүүхийн тогтолцоог бий болгох болон бусад олон асуудлаар хамтарч ажиллах талаар ярилцсан юм.

    Рүдигэр Волфрум нь Монгол Улсын захиргааны процессын эрх зүйн зохицуулалтыг судлан урд нь Монгол Улсад зөвлөгөө өгч байсан эрдэмтэн юм.

         Профессор Рүдигэр Волфрум нь Хамбург хот дахь Далайн олон улсын Дээд шүүхийн гишүүн бөгөөд 2005-2008 онуудад тус шүүхийн Ерөнхийлөгчийн албыг хашиж байсан бөгөөд Олон улсын эрх зүй, Үндсэн хуулийн эрх зүй, Эрх зүйн онол, Захиргааны эрх зүйгээр мэргэшсэн ХБНГУ-ын нэрт хуульч юм.