Монголын Хуульчдын холбооноос өнгөрсөн бямба гаригт /2016.03.12-нд шинэ хуульчдад зориулан уулзалт, сургалтыг зохион байгууллаа. Тус үйл ажиллагааг Хуульчдын холбооны Тамгын газрын дарга Ц.Ганболд нээсэн бөгөөд сургалтад 2015 онд хуульчийн мэргэжлийн шалгалтад тэнцэж, мэргэжлийн үйл ажиллагаа эрхлэх зөвшөөрөл авсан 80 гаруй хуульч хамрагдсан.

    Шинэ хуульчид нь энэ удаагийн сургалтаар Хуульчдын холбооны удирдлага, зохион байгуулалт, хуульч гишүүнийхээ хувьд Холбоотой хэрхэн харилцах, эрхээ хэрхэн эдлэж, үүргээ хэрхэн хэрэгжүүлэх үндэслэл, журмын талаар тодорхой мэдээлэл авсан. Мөн Хуульчийн мэргэжлийн үйл ажиллагаанд баримтлах шаардлага, гарсан зөрчлийг хянан шийдвэрлэх тогтолцоо, зохион байгуулалтын талаарх анхан шатны мэдлэгтэй боллоо. Тодруулбал, Хуульчдын холбооны Тамгын газрын дарга Ц.Ганболд “Хуульчдын холбооны чиг үүрэг, удирдлага зохион байгуулалт” сэдвээр, МХХ-ны Зөвлөхүүдийн зөвлөл хариуцсан мэргэжилтэн, хуульч Б.Төрбат “Хуульчдын холбооны үйл ажиллагаанд хамааралтай хууль, дүрэм, журам тэдгээрийн зохицуулалт” сэдвээр, Мэргэжлийн хариуцлагын хорооны Сахилгын шинжээч Г.Должинсүрэн “Мэргэжлийн хариуцлагын маргаан хянан шийдвэрлэх ажиллагаа” сэдвээр, АШУҮИС-ийн багш, доктор С.Наранчимэг “Хуульчийн сэтгэлд нийцсэн үйлчилгээ” сэдвээр тус тус хичээл заасан юм.