Хуульчдын холбооны Тамгын газрын дарга Ц.Ганболдоор ахлуулсан ажлын хэсэг 2016 оны дөрөвдүгээр сарын 04, 05-нд Дорнод аймагт ажиллах үеэрээ Хуульчдын холбооны орон нутаг дахь салбар зохицуулагчийг сонгох сонгуулийг зохион байгууллаа. Сонгуульд Дорнод аймагт хуульчийн мэргэжлийн үйл ажиллагаа явуулж буй 52 хуульч оролцсоноос өмгөөлөгч Цэнд-Арслангийн Баярмаа олонхын саналаар Хуульчдын холбооны Дорнод аймаг дахь салбарын зохицуулагчаар сонгогдлоо. Өмгөөлөгч Ц.Баярмаа нь 2007-2010 онд Сүхбаатар аймгийн Захиргааны хэргийн шүүхийн шүүгчийн туслах бөгөөд шүүх хуралдааны нарийн бичгийн даргаар, 2010-2014 он хүртэл Дорнод аймгийн Прокурорын газрын туслах ажилтнаар тус тус ажиллаж байсан бөгөөд 2014 оны 12 дугаар сараас хойш өмгөөлөгчөөр ажиллаж байгаа ажээ.
Хуульчдын холбооны орон нутаг дахь салбарын зохицуулагч нь хариуцсан салбар дахь хуульчдыг хууль, Холбооны дүрэмд заасан эрх, үүргээ хэрэгжүүлэхэд нь дэмжлэг, туслалцаа үзүүлэх, Хуульчийн эрх зүйн байдлын тухай хууль, Холбооны дүрэм, Холбооноос баталсан бусад дүрэм, журмыг тухайн орон нутагт хэрэгжүүлэх ажлыг зохион байгуулах, тэдгээрийг боловсронгуй болгох тухай өөрийн болон харьяа хуульчдын саналыг Холбоонд уламжлах, хуульчийн Холбооны өмнө хүлээсэн үүргийн биелэлтэд хяналт тавьж, зөрчлийг арилгуулах ажлыг зохион байгуулах, Холбооны үйл ажиллагааг орон нутагт сурталчлах, мэдээлэх, тухайн орон нутагт тогтвортой үйл ажиллагаа явуулж байгаа хуульчдын бүртгэлийг хөтлөх зэрэг үүргийг хэрэгжүүлэх юм.
