Хуульчдын холбооны Тамгын газрын дарга Ц.Ганболдоор ахлуулсан ажлын хэсэг 2016 оны дөрөвдүгээр сарын 04, 05-нд Дорнод аймагт ажиллалаа.

        Ажлын хэсэг Хуульчдын холбооны үйл ажиллагааг сурталчлах, хуульчийн үргэлжилсэн сургалт зохион байгуулах, үүргийн биелэлтийг хангуулах, тухайн орон нутгийн салбарын зохицуулагчийг сонгох, хуульчдын ажиллах орчин нөхцөлтэй танилцах зорилготойгоор ажилласан юм. Ажлын хэсгийн үйл ажиллагааны хөтөлбөрт тусгагдснаар Удирдлагын академийн багш, доктор А.Алтанзул “Захиргааны ерөнхий хуулийн үзэл баримтлал, танилцуулга” сэдвээр, өмгөөлөгч В.Энхтамир “Газрын харилцаа, үл хөдлөх эд хөрөнгийн эрх зүйн зохицуулалт” сэдвээр, Мэргэжлийн хариуцлагын хорооны сахилгын шинжээч Г.Должинсүрэн “Хуульчийн мэргэжлийн ёс зүй” сэдвээр, УЕПГ-ын хяналтын прокурор Г.Оюунболд “Эрүүгийн хуулийн шинэчилсэн найруулгын үзэл баримтлал, танилцуулга” сэдвээр хичээл заалаа. Энэ удаагийн орон нутгийн сургалт нь 2016 оны дөрвөн багц цаг тооцож байгаагаараа онцлог бөгөөд сургалтад Дорнод аймагт хуульчийн мэргэжлийн үйл ажиллагаа явуулж буй 52 хуульч хамрагдлаа. 

        Энэ үеэр  Хуульчдын холбооны Тамгын газрын дарга Ц.Ганболд Дорнод аймагт мэргэжлийн үйл ажиллагаа явуулж буй хуульчдын ажиллах орчин нөхцөлтэй танилцахын зэрэгцээ шүүх, прокурорын байгууллагын удирдлагуудтай уулзаж санал солицсон юм. Мөн ажлын хэсэг Хуульчдын холбооны Дорнод аймаг дахь салбарын зохицуулагчийг сонгох сонгуулийг зохион байгуулж, сонгуульд оролцсон хуульчдын олонхын саналаар өмгөөлөгч Ц.Баярмаа тус аймаг дахь салбарын зохицуулагчаар сонгогдоод байна.