Хуульчдын холбооны Тамгын газрын дарга Ц.Ганболдоор ахлуулсан ажлын хэсэг 2016 оны дөрөвдүгээр сарын  05, 06-нд Сүхбаатар аймагт ажиллаж, Хуульчдын холбооны үйл ажиллагааг сурталчлах, хуульчийн үргэлжилсэн сургалт зохион байгуулах, тухайн орон нутгийн салбарын зохицуулагчийг сонгох, хуульчдын ажиллах орчин нөхцөлтэй танилцах зэрэг үйл ажиллагаануудыг зохион байгууллаа. Тодруулбал, тус ажлын хэсгийн үйл ажиллагааны хөтөлбөрт тусгагдснаар Удирдлагын академийн багш, доктор А.Алтанзул “Захиргааны ерөнхий хуулийн үзэл баримтлал, танилцуулга” сэдвээр, өмгөөлөгч В.Энхтамир “Газрын харилцаа, үл хөдлөх эд хөрөнгийн эрх зүйн зохицуулалт” сэдвээр, Мэргэжлийн хариуцлагын хорооны сахилгын шинжээч Г.Должинсүрэн “Хуульчийн мэргэжлийн ёс зүй” сэдвээр, УЕПГ-ын хяналтын прокурор Г.Оюунболд “Эрүүгийн хуулийн шинэчилсэн найруулгын үзэл баримтлал, танилцуулга” сэдвээр хичээл заасан бөгөөд сургалтад Сүхбаатар аймагт хуульчийн мэргэжлийн үйл ажиллагаа явуулж буй 32 хуульч хамрагдлаа.

        Энэ үеэр  Хуульчдын холбооны Тамгын газрын дарга Ц.Ганболд Сүхбаатар аймагт мэргэжлийн үйл ажиллагаа явуулж буй хуульчдын ажиллах орчин нөхцөлтэй танилцахын зэрэгцээ шүүх, прокурорын байгууллагын удирдлагуудтай уулзаж санал солицсон юм. Мөн ажлын хэсэг Хуульчдын холбооны Сүхбаатар аймаг дахь салбарын зохицуулагчийг сонгох сонгуулийг зохион байгуулж, сонгуульд оролцсон хуульчдын нууц санал хураалтын дүнд эвлэрүүлэн зуучлагч Ц.Энх-Амар тус аймаг дахь салбарын зохицуулагчаар сонгогдоод байна.