МУИС-ийн Хууль зүйн сургуулиас санаачлан УИХ-ын Тамгын газар, Хууль зүйн яам, Хууль зүйн үндэсний хүрээлэн, Монголын Хуульчдын холбоо, Шинжлэх ухааны академийн Философийн хүрээлэн хамтран “Хууль зүйн нэр томьёоны судалгаа, хэрэглээ” сэдэвт улсын хэмжээний эрдэм шинжилгээний хурлыг 2016.04.08-нд зохион байгууллаа.

        Тус хуралд Хууль зүйн яамны Төрийн нарийн бичгийн дарга Ж.Баярцэцэг, МУИС-ийн Хууль зүйн сургуулийн захирал, профессор, доктор Ж.Эрдэнэбулган, тус сургуулийн зөвлөх профессор, академич С.Нарангэрэл, Шинжлэх ухааны академийн Хэл зохиолын хүрээлэнгийн захирал, академич Л.Болд болон хууль зүйн салбарын нэртэй эрдэмтэн, судлаач, багш нар оролцсон юм.

        Хуралд оролцсон судлаач, эрдэмтдийн зүгээс энэ чиглэлээр цаашид тогтмол хурал, семинар, форум зохион байгуулах, хууль зүйн нэр томъёог нэг мөр зөв хэрэглэж хэвшүүлэх шаардлагатай байгаа зэрэг олон чухал санал гаргасан бөгөөд хурлын үр дүн, хэлэлцүүлгийн үеэрх санал, зөвлөмж, хурлын илтгэлийг эмхэтгэн хэвлүүлж нийтийн хүртээл болгох юм байна.

        Дашрамд дурдахад, МУИС-ийн Хууль зүйн сургуулийн багш нарын хийсэн судалгаагаар 2008-2015 онд нийт 112 хууль шинээр болон шинэчилсэн найруулгаар батлагдаж, давхардсан тоогоор нийт 481 шинэ хууль зүйн нэр томьёо хуульчлагдсанаас 450 нь монгол, 31 нь гадаад нэр томьёо байжээ.