Монголын Хуульчдын холбооноос дөрөвдүгээр сарыг “Сургалтын сарын аян” болгон зарлалаа

    Хуульчийн үргэлжилсэн сургалтыг сурталчлах, Хуульчдын холбоо болон гишүүдийн хоорондын уялдаа холбоог сайжруулах зорилготой тус аяны эхлэл болгож Хуульчдын холбооноос томилогдсон ажлын хэсэг 2016 оны дөрөвдүгээр сарын 04-08-ны өдрүүдэд Хэнтий, Сүхбаатар, Дорнод аймагт хуульчийн үргэлжилсэн сургалтыг зохион байгуулж, 120 хуульч сургалтад хамрагдлаа. Тус сургалтаар Удирдлагын академийн багш, доктор А.Алтанзул “Захиргааны ерөнхий хуулийн үзэл баримтлал, танилцуулга” сэдвээр, өмгөөлөгч В.Энхтамир “Газрын харилцаа, үл хөдлөх эд хөрөнгийн эрх зүйн зохицуулалт” сэдвээр, Мэргэжлийн хариуцлагын хорооны сахилгын шинжээч Г.Должинсүрэн “Хуульчийн мэргэжлийн ёс зүй” сэдвээр, УЕПГ-ын хяналтын прокурор Г.Оюунболд “Эрүүгийн хуулийн шинэчилсэн найруулгын үзэл баримтлал, танилцуулга” сэдвээр хичээл заасан бөгөөд энэ удаагийн сургалт нь хуульчийн жилд хангах ёстой дөрвөн багц цагийг тооцсноороо онцлог байсан юм.

        Хуульчдын холбооноос “Сургалтын аян”-ы хүрээнд дараах үйл ажиллагаануудыг үргэлжлүүлэн зохион байгуулах гэж байна.

1. “Хуульчийн ур чадварыг нэмэгдүүлэх арга зам” сэдэвт хэлэлцүүлгийг 2016 оны 4 дүгээр сарын 21-нд зохион байгуулна.
2. “Хуульчийн үргэлжилсэн сургалтын хэрэгцээ” хэлэлцүүлгийг  2016 оны 4 дүгээр сарын 25-нд зохион байгуулж, хэлэлцүүлэгт оролцсон хуульчдад зориулж “Хуульчийн харилцаа ба хандлага” сэдвээр 0.5 багц цаг тооцох төлбөргүй сургалтыг явуулна.
3. Сургалтын багц цагаа хугацаанд нь тогтмол хангаж, бусад хуульчиддаа үлгэр дууриал болсон хуульчийг олон нийтэд сурталчилна.
4. Сургалтаа цаг хугацаанд нь чанартай явуулж, суралцагчдаас өндөр үнэлгээ авдаг сургагч багшийг шалгаруулж урамшуулна.
5. Хууль зүйн яамтай хамртан Эрүүгийн тухай хууль, Зөрчлийн тухай хуулийн шинэчилсэн найруулгаар сургагч багш бэлтгэх зэрэг үйл ажиллагааг зохион байгуулах юм.

Холбоо барих: 70116065-(1)