Монголын Хуульчдын холбооноос зохион байгуулсан “Өмгөөллийн нөхөрлөлийн хөгжлийн асуудал” зөвлөлдөх уулзалтаас гаргасан санал, санаачлагыг хэрэгжүүлэх зорилгоор тус холбооны удирдлагууд Монгол Улсад үйл ажиллагаа явуулж буй өмгөөллийн нөхөрлөлүүдийн үйл ажиллагаатай танилцаж, тэдгээрийн удирдлагуудтай уулзаж санал солилцох ажлыг зохион байгуулж байгаа билээ. Энэ хүрээнд өнөөдөр (2016.05.06) Монголын Хуульчдын холбооны ерөнхийлөгч Б.Гүнбилэг, Тамгын дарга Ц.Ганболд нар “ЭмДиЭс энд ХаанЛекс” ХХН-д зочилж тус нөхөрлөлийн партнер Ж.Майзориг, Д.Дүгэржав нартай уулзан нөхөрлөлийн хөгжлийн асуудал болон үйл ажиллагаанд тулгамдаж буй бусад асуудлын талаар санал солилцлоо.

        Уулзалтаар Өмгөөллийн нөхөрлөлийн хөгжлийн дэд хороог байгуулахад нөхөрлөлүүдийн өөрсдийн идэвх санаачлага онцгой ач холбогдолтой болохыг дурдаад, Хуульчдын холбооны зүгээс туслалцаа, дэмжлэг үзүүлэх боломжтойг тус Холбооны удирдлагууд илэрхийлэв. Цаашилбал, хуульчийн мэргэжлийн үйл ажиллагааны хариуцлага, түүний үр дагавар, даатгалын асуудал, өмгөөллийн нөхөрлөлд ногдуулж байгаа орлогын татварын давхардлын асуудал болон хуульчийн мэргэжлийн үйл ажиллагаанд мэдээлэл технологийн ололт дэвшлийг ашиглах боломж, санаачлагын талаар санал солилцсон юм.