Монголын Хуульчдын холбооны ерөнхийлөгчийн нэрэмжит “Mock trial” шүүхийн мэтгэлцээний тэмцээний шагнал гардуулах ёслолын ажиллагаа өнөөдөр /2016.05.09/-нд боллоо. Ёслолд Хуульчдын холбооны ерөнхийлөгч Б.Гүнбилэг, Зөвлөлийн гишүүн Л.Энхсайхан, Хууль зүйн шинжлэх ухаан боловсролын хөгжлийг дэмжих хорооны дарга Ц.Мөнхбат, Хуульчдын холбооны Тамгын газрын дарга Ц.Ганболд, Бодлого зохицуулалтын хэлтсийн дарга А.Оюунчимэг болон шагналт байрт шалгарсан хууль зүйн их дээд сургуулийн багш, оюутнууд оролцлоо.

    Хуульчдын холбоо нь “Моск trial” шүүхийн мэтгэлцээний тэмцээнийг 2016.05.06-2016.05.08-ны өдрүүдэд УЕПГ-ын дэргэдэх Сургалт судалгааны төвд эрүүгийн хэрэг, иргэний хэрэг, захиргааны хэргийн мэтгэлцээн гэсэн гурван төрлөөр зохион байгуулсан юм. Энэ удаагийн тэмцээнд МУИС-ийн ХЗС, Хууль сахиулахын их сургууль, “Их засаг”, “Шихихутуг”, “Улаанбаатар”, “Билиг”, Отгонтэнгэр, Монголын үндэсний их сургууль зэрэг 8 сургуулийн 18 багийн оюутнууд оюун ухаан, ур чадвараа өрсөлдлөө. Үүнээс Эрүүгийн хэргийн шүүхийн мэтгэлцээний тэргүүн байрт, “Шихихутуг” ХЗС, дэд байрт МУИС-ийн ХЗС, Иргэний хэргийн шүүхийн мэтгэлцээний нэгдүгээр байрт МУИС-ийн ХЗС, хоёрдугаар байрт “Их засаг” олон улсын их сургууль, Захиргааны хэргийн шүүхийн мэтгэлцээнд Олон улсын “Улаанбаатар” их сургууль тэргүүн байрт, МУИС-ийн ХЗС дэд байр шалгарсан юм.

     “Mock Trial” тэмцээнийг Монголын Хуульчдын холбооноос зохион байгуулахад “Монгол өмгөөлөгч”, “Түшиг”, “Жалайр Чо” зэрэг өмгөөллийн нөхөрлөлүүд дэмжлэг үзүүлсэний зэрэгцээ иргэн, эрүү, захиргааны хэргийн анхан болон давж заалдах шатны шүүхийн 27 шүүгч шүүгчээр ажиллалаа.