Монголын Хуульчдын холбооноос Монголын Банкны холбоотой хамтран 2016 оны дөрвөн багц цаг олгох хуульчийн үргэлжилсэн сургалтыг 2016.05.03-2016.05.06-ны өдрүүдэд зохион байгууллаа.

     Энэ удаагийн сургалт нь шинээр батлагдаад байгаа Эрүүгийн хууль, Захиргааны ерөнхий хууль, Зөрчлийн тухай хуулиудын талаарх мэдээллийг хуульчиддаа хүргэж, танилцуулж буйгаараа онцлог байсан бөгөөд Үндэсний Тагнуулын академийн Төр онолын тэнхэмийн эрхлэгч, доктор Б.Нармандах, ХСИС-ийн Төр эрх зүйн онолын тэнхэмийн багш Н.Мөнхзул нар “Захиргааны ерөнхий хуулийн үзэл баримтлал” сэдвээр,  ХСИС-ийн Эрдмийн зэрэг хамгаалуулах зөвлөлийн ажлын албаны хэвлэл, редакцийн хэлтсийн дарга, доктор С.Гантулга “Зөрчлийн тухай хуулийн үзэл баримтлал” зэрэг сэдвээр, Иргэний хэргийн давж заалдах шатны шүүхийн шүүгч М.Наранцэцэг “Түрээсийн гэрээтэй холбогдох хуулийн зохицуулалтыг хэрэглэхэд анхаарах асуудал” сэдвээр,  Иргэний хэргийн давж заалдах шатны шүүхийн шүүгч Э.Золзаяа “Иргэний хэрэг шүүхэд хянан шийдвэрлэх ажиллаагааны эрх зүй” сэдвээр тус тус хичээл заалаа.

    Тус сургалтад Монгол Улсад үйл ажиллагаа явуулж буй найман банкны 40 хуульч хамрагдсан юм. Эдгээр хуульч нь Хуульчдын холбооны гишүүн хуульч бөгөөд Холбооны зүгээс хуульчдынхаа цаг, боломжийг хүндэтгэн үзэж, сургалтад хамрагдсан хуульчдыг 2016 оныхоо дөрвөн багц цагийг хангасанд тооцсон юм.

    Дашрамд дурдахад, тус сургалтын нээлт, хаалтын үйл ажиллагаанд Хуульчдын холбооны Тамгын газрын дарга Ц.Ганболд биечлэн оролцож, “Цаашид Монголын Банкны холбоотой хамтран ажиллахаас гадна банкуудаас хэрэглэгчдэд үзүүлж буй гэрээ, контрактын тал дээр адил тэгш байдлыг хангах чиглэлээр хууль зүйн мэдлэг олгохын зэрэгцээ хэрэглэгчийн эрхийг хамгаалж ажиллана” гэдгээ дуулгасан юм.