Шүүхийн захиргааны тухай хуулийн 23 дугаар зүйлийн 23.3 дахь хэсэг, Хуульчдын холбооны дүрмийн 4.13 дугаар зүйлийн 1.23 дахь заалтын дагуу Шүүхийн мэргэшлийн хорооны 1 гишүүний оронд нэр дэвшүүлэх ажиллагааг 2016.06.08-2016.06.15-ны өдрийн хооронд Монголын Хуульчдын холбооны Тамгын газар, Хуульчийн мэргэжлийн шалгалтын асуудал эрхэлсэн хороо хамтран зохион байгууллаа.

Тус нэр дэвшүүлэх ажиллагаанд нийт 9 хуульч нэрээ дэвшүүлж, холбогдох материалаа ирүүлснээс Хуульчийн мэргэжлийн шалгалтын асуудал эрхэлсэн хорооны 2016.06.16-ны өдрийн хуралдаанаар нэр бүхий 7 нэр дэвшигчийг Шүүхийн захиргааны тухай хуульд заасан Шүүхийн мэргэшлийн хорооны гишүүнд тавигдах шаардлагыг "хангана", 2 нэр дэвшигчийг "хангахгүй" гэж тус тус үзсэн байна.

Үүнтэй холбогдуулан Шүүхийн мэргэшлийн хорооны гишүүнийг сонгох асуудлаар Хуульчдын холбооны зөвлөлийн гишүүдээс санал авах ажиллагааг 2016.06.20-2016.06.23-ны өдрийн хооронд зохион байгуулсан бөгөөд нэр дэвшигч М.Батсуурь, Д.Мөнхтуяа нар нь санал хураалтад оролцсон гишүүдээс хамгийн олон санал авч, санал тэнцээд байсан юм.

Иймд Хуульчдын холбооны зөвлөлийн ээлжит бус хуралдааныг 2016.06.27-ны өдөр зарлан хуралдуулж, тус хуралдаанаар хамгийн олон санал авсан нэр бүхий дээрх 2 дэвшигчийн талаар дахин санал хураалт явуулсны эцэст хуралдаанд оролцсон гишүүдийн олонхийн саналаар Улсын Дээд шүүхийн шүүгч Дашдоржийн Мөнхтуяаг Шүүхийн мэргэшлийн хорооны гишүүнд санал болгохоор шийдвэрлэлээ.

МОНГОЛЫН ХУУЛЬЧДЫН ХОЛБОО

ТАМГЫН ГАЗАР