Монголын Хуульчдын Холбооны гишүүн хуульч Р.Мандухай Залуу Хуульчдын Олон Улсын Холбоо (AIJA)-ны тэтгэлгээр 61 дэх удаагийн Олон Улсын Залуу Хуульчдын Их Хуралд Монгол Улсаас анх удаа оролцлоо. 

Залуу Хуульчдын Олон Улсын Холбоо (AIJA) нь 1962 онд байгуулагдсан бөгөөд залуу хуульчдад олон улсын хэмжээнд сүлжээ үүсгэх, бусад орны залуу хуульчидтай санал солилцох, туршлага судлах, суралцах боломж олгодог дэлхийн 100 гаруй улсын 4000 гаруй гишүүд болон дэмжигчтэй ашгийн төлөө бус олон улсын холбоо юм. Жил бүр зохион байгуулагдах их хурлаас гадна 20 гаруй бага хурал, семинар, сургалт зохион байгуулагддаг. 

61 дэх удаагийн Олон Улсын Залуу Хуульчдын Их Хурал нь Бразил улсын Рио Де Жанейро хотод “Үйлчлүүлэгчдэд ирээдүйд тулгарч болох асуудлуудыг урьдчилан таамаглаж, тэдгээрийн хуулийн шийдлийг тодорхойлох нь” гэсэн ерөнхий сэдвийн хүрээнд 5 өдрийн турш хэлэлцүүлэг зохион байгуулагдсан бөгөөд нийт 55 гаруй орны 400 гаруй хуульчид оролцжээ. 

Мөн академик хэлэлцүүлгээс гадна нийтийн арга хэмжээ зохиогддог бөгөөд оролцогч хуульчид хоорондоо танилцах, нөхөрсөг холбоо үүсгэх, бусад орны соёлтой танилцах боломжийг олгодог нь уг холбооны хамгийн гол онцлог юм. 

Олон Улсын Залуу Хуульчдын 62 дахь удаагийн Их Хурал Испани улсын Мадрид хотод 2024 оны 9 дүгээр сарын 3-ны өдрөөс 9 дүгээр сарын 7-ны өдрийн хооронд “Дэлхий нийтэд тулгараад буй асуудлуудыг шийдвэрлэхэд олон улсын хуульчдын үүрэг оролцоо” гэсэн ерөнхий сэдвийн хүрээнд зохион байгуулагдана. 

Дэлгэрэнгүйг: https://madrid.aija.org/