Монголын Хуульчдын холбооны Захиргааны эрх зүйн хорооноос санаачлан “Захиргааны эрх зүйн тусгай ангийн хөгжилд хуульчдын санаачлага” сэдэвт хэлэлцүүлгийг 2024 оны 02 сарын 22-ны өдөр Төрийн албаны зөвлөлийн  сургалтын танхимд амжилттай зохион байгууллаа.

Тус хэлэлцүүлгийн панелистаар Улсын дээд шүүхийн шүүгч, доктор Ц.Цогт, Хүний эрхийн үндэсний комиссын дарга, доктор Д.Сүнжид, МУИС-ийн Хууль зүйн сургуулийн дэд профессор, доктор Д.Батболд, Удирдлагын академийн Эрх зүйн тэнхимийн эрхлэгч, доктор А.Алтанзул нар оролцож, чиглүүлэгчээр Захиргааны эрх зүйн хорооны тэргүүн, шүүгч Т.Мөнх-Эрдэнэ ажиллалаа.

Уг хэлэлцүүлгийн зорилго нь цаашид Монгол Улсын захиргааны эрх зүйн тусгай ангийн салбарын хууль тогтоомжийг орчин үеийн дэлхий дахины чиг хандлагад нийцүүлэн боловсронгуй болгох, Монголын онцлогт нийцүүлсэн тусгай ангийн салбарын хууль тогтоомжийн системчлэлийг хөгжүүлэх, энэ салбарын шинжлэх ухааны болон бодлогын судалгааг эрчимжүүлэх, хууль зүйн их, дээд сургуулиудын захиргааны эрх зүйн тусгай ангийн хичээлийн хөтөлбөр, сургалтын бодлогод анхаарал хандуулах зэрэг шийдлээ хүлээж буй тулгамдсан асуудлуудыг хэлэлцэн тодорхойлж, хууль зүйн салбарын хөгжлийн бодлогын баримт бичгүүдэд тусгуулах талаар хуульчдын санал санаачилгыг өрнүүлэх, нэгтгэх зорилготой юм.

Энэ хэлэлцүүлгээс гарсан санал санаачлага, үр дүнг нэгтгэн 2024 оны Хуульчдын форумд хэлэлцүүлж, тодорхой зөвлөмж гаргах талаар Захиргааны эрх зүйн хороо анхаарч ажиллахаар тогтов.