Монголын Хуульчдын холбооны Дундговь аймаг дахь салбар, Дундговь аймгийн Засаг даргын Тамгын газар хамтран Дундговь аймгийн Сайнцагаан сумын төвд 2025 оны 05 дугаар сарын 1-ний өдөр “Хуульчийн про боно - 2025” өдөрлөгийг амжилттай зохион байгууллаа.

Өдөрлөгийн нээлтэнд аймгийн шүүхийн Ерөнхий шүүгч Ц.Отгонцэцэг, аймгийн прокурорын газрын орлогч прокурор Э.Нямбилэгт, Шүүхийн шинжилгээний хэлтсийн дарга н.Мөнхбаяр, Өмгөөлөгчдийн зөвлөлийн дарга Д.Долгорсүрэн, Шүүхийн шийдвэр гүйцэтгэх газрын дэд дарга С.Энхбат, МХХ-ны салбарын зохицуулагч Ж.Чимэддулам нар оролцов.

Нийтийн эрх, хууль ёсны ашиг сонирхлыг хамгаалах, хууль зүйн туслалцаа үзүүлэх, иргэний эрх зүйн боловсролыг дээшлүүлэх, хууль сурталчлах, иргэдэд төрийн үйлчилгээ хүргэх зорилготой тус өдөрлөгт Хуульчдын холбооны гишүүн Дундговь аймгийн хуульчид, шүүгч, прокурор, нотариатч, өмгөөлөгчид иргэдэд хууль зүйн үнэ төлбөргүй зөвлөгөө өгч, Дундговь аймгийн анхан болон давж заалдах шатны шүүх, Прокурорын газар, Цагдаагийн газар, Өмгөөлөгчдийн зөвлөл, Шүүхийн шийдвэр гүйцэтгэх газар, Шүүхийн шинжилгээний хэлтэс, Нотариатчдын танхим, Хүний эрхийн үндэсний комисс, Хууль зүйн Туслалцааны төв, Улсын бүртгэлийн хэлтэс, Нийгмийн даатгалын газар, Татварын газар зэрэг нийт 12 байгууллага оролцож, иргэдэд хууль зүйн үнэ төлбөргүй зөвлөгөө өгөх, төрийн байгууллагууд байгууллагын үйл ажиллагаатай холбоотой мэдээлэл, зөвлөгөө, үйлчилгээ үзүүлж, иргэдийн гомдол мэдээллийг хүлээн авч ажиллав.

Мөн өдөрлөгийн хүрээнд аймгийн прокурорын газрын ахлах прокурор Э.Энхтулга, Өмгөөлөгчдийн зөвлөлийн өмгөөлөгч Т.Дашцэрэн нар аймгийн төвийн Ерөнхий боловсролын “Говийн ирээдүй цогцолбор”, “Хүмүүнлэг”, “Мандал” сургуулийн сурагчдад “ Цахим орчны зохистой хэрэглээ” сэдвээр сургалт зохион байгуулав.