Монголын Хуульчдын холбоо нь "Их Засаг" их сургуулийн хууль зүйн сургуультай хамтран ажиллах гэрээ байгуулж, Монголын Хуульчдын холбооны Ерөнхийлөгч М.Мөнхбат, "Их Засаг" хууль зүйн сургуулийн захирал Ц.Алтангэрэл нар өнөөдөр гарын үсэг зурж баталгаажууллаа.

Талууд хамтран ажиллах гэрээний хүрээнд Холбооны гишүүн хуульч, ажилтан, албан хаагчдыг тус сургуулийн магистр, докторын зэрэг олгох сургалтад хөнгөлөлттэй нөхцөлөөр сургах, сургуулийн онол, арга зүйн болон мэдээллийн сэтгүүлд Холбооны гишүүн хуульчдын мэргэжлийн шаардлага хангасан эрдэм шинжилгээний өгүүллийг нийтлэх, харилцан мэдээлэл солилцох, хууль, эрх зүйн боловсрол судлалыг хөгжүүлэх, төсөл хөтөлбөр хэрэгжүүлэх, харьцуулсан эрх зүйн болон бусад судалгаа хийх, хэлэлцүүлэг, эрдэм шинжилгээний хурал, мэтгэлцээн зохион байгуулах зэрэг асуудлаар хамтын ажиллагааг хөгжүүлж ажиллахаар болов.

Тус гарын үсэг зураг ёслолын ажиллагаанд Монголын Хуульчдын холбооны Зөвлөлийн гишүүн Г.Наранбаатар оролцлоо.