Монголын Хуульчдын холбооны Ерөнхийлөгч М.Мөнхбат АНУ-ын Худалдааны яамны дэргэдэх Арилжааны эрх зүйн хөтөлбөрийн Олон улсын зөвлөх хуульч Гришма Прадханыг өнөөдөр хүлээн авч уулзлаaа. 

Энэ удаагийн уулзалтаар Монгол Улсын арилжааны эрх зүй, гадаадын хөрөнгө оруулалтын эрх зүй, бизнесийн эрх зүйн орчныг боловсронгуй болгох, олон улсын шилдэг туршлагыг нутагшуулах, чиглэлээр урт хугацаанд хамтран ажиллах талаар санал солилцлоо. 

Үүнд тухайлбал, төр-хувийн хэвшлийн түншлэлийн эрх зүйн чиглэлийн мэргэшсэн хуульч бэлтгэх, дэд бүтцийн гэрээ хэлэлцээрийн чиглэлээр хуульчдыг чадавхижуулах хөтөлбөр хэрэгжүүлэх,  мөн арилжааны эрх зүйн чиглэлээр мэргэшсэн хуульч, болон сургагч багш бэлтгэх, зэрэг хуульчдын мэргэжлийн чадавхыг дээшлүүлэх сургалт, хөтөлбөрүүдийг үе шаттайгаар хэрэгжүүлэх, институцийн түвшний хамтын ажиллагааг өргөжүүлэхээр харилцан тохиролцов. 

Түүнчлэн, өмнөх жилүүдэд хэрэгжүүлсэн олон улсын арбитрын сургалт хөтөлбөр, мөн олон улсын эвлэрүүлэн зуучлалын хөтөлбөрүүдийг цаашид бэхжүүлэх, үргэлжлүүлэхээр санал солилцов. 

Өнгөрсөн хугацаанд АНУ-ын Худалдааны яамын Арилжааны эрх зүйн хөтөлбөр нь Монголын Хуульчдын холбооны хүсэлтээр дэлхийн шилдэг, олон улсын хуулийн фирмүүдийн хуульчдыг манай улсад урьж  нийт 300 гаруй хуульчдад сургалт, зохион байгуулж сертификат гардуулсан юм. 

АНУ-ын худалдааны яамны дэргэдэх Арилжааны эрх зүйн хөтөлбөр нь хөгжиж буй улс орны гадаадын хөрөнгө оруулалтын эрх зүйн орчин болон бизнесийн эрх зүйн орчныг сайжруулах, боловсронгуй болгох чиглэлээр дэлхийн даяар үйл ажиллагаа явуулдаг юм. 

Тус уулзалтад Монголын Хуульчдын холбооны Тамгын газрын дарга Ш.Жолбарс, Олон Улсын эрх зүйн хорооны Тэргүүн Х.Наранбулаг нар оролцлоо.