Улсын Их хурлын гишүүн, Хууль зүй, дотоод хэргийн сайд, С.Амарсайхан Монголын Хуульчдын холбооны удирдлагуудтай өнөөдөр(2026.04.17) албан уулзалт хийлээ.

Уулзалтад Монголын Хуульчдын холбооны Ерөнхийлөгч М.Мөнхбат, Зөвлөлийн гишүүн Ц.Мөнхбат, В.Удвал, Ц.Ганболд, Д.Түмэнжаргал, О.Энхболд, Шүүгчдийн хорооны Тэргүүн Л.Батбаатар, Прокурорын хорооны Тэргүүн Э.Энхбат, Өмгөөлөгчдийн хорооны Тэргүүн Д.Оросоо, Тамгын газрын дарга Ш.Жолбарс болон холбогдох албаны хүмүүс оролцсон.

Уулзалтаар хууль эрх зүйн орчны реформ шинэчлэлийг эрчимжүүлэх, хууль тогтоомжийг боловсронгуй болгох, хуульчдыг мэргэшүүлэх, мэргэжлийн өөрөө удирдах ёсны байгууллагуудын бүтэц, зохион байгуулалтыг шинэ түвшин гаргах зэрэг асуудлыг хөндөн ярилцсан.

Тодруулбал, Хууль зүй, дотоод хэргийн сайд С.Амарсайхан Хуульчийн эрх зүйн байдлын тухай хуулийг шинэчлэн найруулах, илүү амьдрал нийцсэн байхаар өөрчлөх, хуулийн хэрэгжилтийн үнэлгээний судалгааг Монголын Хуульчдын холбооны дэмжлэгтэйгээр хийхээр төлөвлөөд байгааг хэлсэн. Мөн тэрбээр хууль зүйн салбар нь хангалттай мэдээлэлтэй байдаг ч нэгдсэн системгүй, үр дүн муутай байгаа тул салбарын бүх байгууллагын мэдээллийг нэгтгэсэн нэг архитектур бүхий өгөгдлийн сан бүрдүүлж, шийдвэр гаргалтыг ил тод, хурдтай, хариуцлагатай болгохоор ажиллаж байгааг дуулгалаа.

Монголын Хуульчдын холбооны Ерөнхийлөгч М.Мөнхбат “Хуульч бэлтгэх тогтолцоог сайжруулахад анхаарч, эрх зүйч байхаас нь хуульч болох хүртэл бэлтгэхэд манлайлан ажиллахын зэрэгцээ Монголын Хуульчдын холбоо нь салбарынхаа хэмжээнд цахим шинэчлэлийг хийхэд санаачилга гаргаж, хуульчдын нэгдсэн платформыг хөгжүүлэхийг зорьж байгаа” гэдгийг дуулгасан юм.

Энэхүү уулзалтаар цаашид Хууль зүй, дотоод хэргийн яам, Монголын Хуульчдын холбоо нь хууль эрх зүйн салбарыг хөгжүүлэх, хуулийн хэрэгжилтийн үнэлгээ хийх, Хууль зүйн сургуулийн хөтөлбөрийн магадлан итгэмжлэлийг хэрэгжүүлэх зэрэг ажилд төлөвлөгөө гаргаж хамтарч ажиллахаар боллоо.

Мөн Монгол Улсад болох СОР17 НҮБ-ын бага хурлыг зохион байгуулахад хуульчид хууль эрх зүйн тал дээр дэмжлэг үзүүлж, хамтарч ажиллахаар ярилцлаа.