Монголын Хуульчдын холбооны Ерөнхийлөгч М.Мөнхбат Шүүхийн захиргааны Олон Улсын холбооны Ерөнхийлөгч Памела Харрис тэргүүтэй төлөөлөгчдийг өнөөдөр (2026.09.16) хүлээн авч уулзлаа.

Уулзалтаар Хуульчдын мэргэжлийн байгууллага болон шүүхийн захиргааны чиглэлээр үйл ажиллагаа явуулдаг олон улсын байгууллагуудын хамтын ажиллагааг өргөжүүлэх, харилцан туршлага солилцох, мэргэжлийн хөгжлийг дэмжих чиглэлээр санал солилцлоо.

Мөн Монгол Улсын хууль зүйн салбарын хөгжил, шүүхийн захиргаа болон олон улсын хамтын ажиллагааны хүрээнд хэрэгжүүлж буй болон цаашид хэрэгжүүлэх боломжтой төсөл, хөтөлбөрүүдийн талаар талууд байр сууриа хуваалцсан.

Тус холбооны төлөөлөгчид хүн төвтэй шүүхийн тогтолцоог хөгжүүлэхийн ач холбогдлыг онцолж, иргэн шүүхэд хандах үедээ шүүхийн үйл явцын талаар ойлголттой байх, шаардлагатай тохиолдолд мэргэжлийн хуульчийн туслалцаа, төлөөллийг авах боломжийг нэмэгдүүлэх нь чухал болохыг онцоллоо.

Тус уулзалтад Шүүхийн захиргааны олон улсын холбооны үйл ажиллагаа хариуцсан захирал Кевин Бовлинг, Шүүхийн ерөнхий зөвлөлийн гишүүн Г.Даваадорж, АНУ-ын Монгол Улс дахь Элчин сайдын яамны Улс төрийн хэлтсийн ажилтан М.Номинцэцэг, Монголын Хуульчдын холбооны Тамгын газрын дарга Ш.Жолбарс, Гадаад харилцааны зөвлөх Ц.Одонжав, Зөвлөлийн гишүүн, Олон Улсын эрх зүйн хорооны тэргүүн Э.Алимаа нар оролцлоо.