2014 оны 4 сарын 2
Хуульчдын холбооны Захиргааны эрх зүйн хороо, Хууль сахиулахын их сургууль хамтран “Нийтийн эрх зүйн хэм хэмжээний хэрэглээ, анхаарах зарим асуудал” сэдэвт онол практикийн бага хурлыг дөрөвдүгээр сарын 1-нд Хуульчдын танхимд зохион байгууллаа.
Бага хурлын эхэнд ХСИС-ийн багш, ахлах дэслэгч Т.Азжаргал “Үндсэн хууль нийтийн эрх зүйн үндсэн эх сурвалж болох нь” сэдвээр илтгэл тавьж, Үндсэн хуулийг зөрчсөн цөөнгүй асуудал байгааг дурьдав. Энэ хурлын өөр нэг гол сэдэв нь ХСИС-ийн Төр, захиргааны эрх зүйн тэнхимийн ахлах багш, цагдаагийн ахмад Н.Мөнхзулын хэлэлцүүлсэн “Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн хэрэглээ, анхаарах асуудал” байлаа. Тэрбээр илтгэлээрээ “Сонирхлын зөрчил гэсэн ойлголт нэг талаас нийтийн албан тушаалтны ёс зүйн шаардлага, нөгөө талаас авлигын сүүдэр, шалтгаан болж яригдсаар ирсэн. Нийтийн албан тушаалтан ажил үүргээ гүйцэтгэхэд хувийн сонирхол зүй бусаар нөлөөлсөн үед авлига бий болдог нийтлэг зүй тогтол байдаг. Сонирхлын зөрчил нь авлига биш, харин авлига бий болгох хөрс суурь, шалтгаан болдог. Тиймээс сонирхолын зөрчлийг зохицуулах нь авлигаас урьдчилан сэргийлэх, авлигатай тэмцэх томоохон механизмд тооцогддог” гэдгийг онцоллоо.
Уг хуралд Гадаад харилцааны яам, Авилгатай тэмцэх газар, Иргэний харьяалал, шилжилт хөдөлгөөний газар болон дүүргүүдийн Цагдаагийн хэлтсийн төлөөлөл оролцлоо. Эдгээр байгууллагуудынхаа түвшинд ярилцаж удирдах ажилтан, гүйцэтгэх албан тушаалтан, сургалт судалгааны байгууллагуудад хандсан Нийтийн эрх зүйн хэм хэмжээг хэрэглэхэд анхаарах зөвлөмжийг гаргаж, тухайн байгууллагуудад хүргүүлэхээр шийдвэрлэв. Уг зөвлөмжид Нийтийн эрх зүйн хүрээн дэх Монгол Улсын Олон улсын гэрээг нийтийн эрх зүйн салбар бүрээр түүвэрлэн эмхтгэх, холбогдох байгууллага, албан тушаалтанд тараах талаар тусгажээ. Түүнчлэн нийтийн эрх зүйн аливаа хэм хэмжээг Үндсэн хуулийн эрх зүйн зарчим, үзэл баримтлалтай холбон тайлбарлах, хэрэглэх, Ашиг сонирхлын зөрчлөөс урьчдилан сэргийлэх ажлын арга хэлбэрийг сайжруулах, Хууль хэрэгжүүлэхтэй холбогдсон тулгамдсан асуудлыг дээд шатны албан тушаалтанд уламжлах зэргийг зөвлөсөн байна.
