Монголын Хуульчдын холбооны зөвлөлийн 2014 оны 12 дугаар сарын 27-ны өдрийн ээлжит хурлаар Монгол Улсын Хууль зүй, дотоод хэргийн сайдын 2008 оны 71 дүгээр тушаалаар өмгөөллийн үйл ажиллагаа эрхлэх тусгай зөвшөөрлийг хүчингүй болгосон иргэдийг хуульчдын нэгдсэн бүртгэлд бүртгэх эсэх асуудлыг хэлэлцэж шийдвэрлэлээ.

Захиргааны хэргийн анхан шатны 20 дугаар шүүхийн 2014 оны 10 дугаар сарын 17-ны өдрийн  476 дугаар тогтоолыг үндэслэн Монгол Улсын Хууль зүйн сайдын 2014 оны 11 дүгээр сарын 04-ний өдрийн А/189 дүгээр тушаалаар Хууль зүй, дотоод хэргийн сайд /хуучнаар/-ын 2008 оны 71 дүгээр тушаалыг хүчингүй болгоод байсан билээ.

Хууль зүй, дотоод хэргийн сайдын 2008 оны 71 дүгээр тушаалаар өмгөөллийн үйл ажиллагаа эрхлэх тусгай зөвшөөрөл нь хүчингүй болсон зарим иргэн хуульчдын нэгдсэн бүртгэлд бүртгүүлэхээр Хуульчдын холбоонд хүсэлт гаргасан юм. Иймд уг тушаалын хавсралтад нэр заасан иргэдийг хуульчдын нэгдсэн бүртгэлд бүртгэх эсэх асуудлыг дээрх Холбооны зөвлөлийн хурлаар хэлэлцүүлжээ.

Тус хурлаар Хууль зүй, дотоод хэргийн сайдын 2008 оны 71 дүгээр тушаалын хавралтад нэр заасан иргэд нь Хууль зүйн сайдын 2014 оны 11 дүгээр сарын 04-ний өдрийн А/189 дүгээр тушаалыг мэдсэнээс хойш 3 сарын дотор Хуульчдын холбоонд гишүүнээр элсэх өргөдлөө гаргасан тохиолдолд зохих журамд заасны дагуу хуульчдын нэгдсэн бүртгэлд бүртгэж байхаар шийдвэрлэсэн байна. 

ХУУЛЬЧДЫН ХОЛБООНЫ ХЭВЛЭЛ МЭДЭЭЛЭЛ,

ОЛОН НИЙТТЭЙ ХАРИЛЦАХ ХЭЛТЭС