Хуульчдын холбооны зөвлөлийн 2014 оны гуравдугаар сарын 1-ний өдрийн хурлын 37 дугаар тогтоолоор тус холбооноос олгосон эрх хэмжээ, чиглэлийн хүрээнд үйл ажиллагаа явуулах 21 аймгийн салбарыг байгуулж, тухайн орон нутагт ажиллах салбарын зохицуулагчийг сонгон шалгаруулахаар шийдвэрлэсэн билээ.

        Уг тогтоолын хэрэгжилтийг хангах үүднээс тус холбооны Тамгын газраас орон нутаг дахь салбарын зохицуулагчийг сонгон шалгаруулах үйл ажиллагааг 2014 оны долдугаар сарын 28-ны өдрөөс наймдугаар сарын 20-ны өдрийн хооронд зохион байгуулж, холбогдох удирдамжийг тухайн орон нутгийн шүүх, прокурорын байгууллага, Монголын Өмгөөлөгчдийн холбооны Өмгөөлөгчдийн салбар зөвлөл, аймгийн Засаг даргын Тамгын газрын Хууль зүйн хэлтэст хүргүүлсэн.

        Тус удирдамжийн дагуу 21 аймгаас нийт 54 хуульч материалаа ирүүлсэн бөгөөд эдгээр хуульчдын материалыг Хуульчдын холбооны удирдлагууд авч хэлэлцээд, Баянхонгор, Говь-Алтай, Дархан-Уул, Завхан аймгийн салбарын зохицуулагчид нэр дэвшигчийг тухайн аймгийнх нь нийт хуульчдын дунд санал асуулга явуулж, түүний үр дүнг харгалзан томилохоор болоод байна.

Эдгээр аймгийн салбарын зохицуулагчид нэр дэвшигчдийн талаар явуулах санал асуулгыг 2015 оны нэгдүгээр сарын 12-оос 17-ны өдрийн хооронд Хуульчдын холбооны цахим хуудсаар явуулна.

Иймд дээрх дөрвөн аймгийн хуульч та бүхнийг http://mglbar.mn/ сайт руу өөрийн гишүүний эрхээр нэвтэрч, санал асуулгад идэвхтэй оролцохыг уриалж байна.

Жич: Санал асуулгатай холбоотой мэдээллийг Хуульчдын холбооны салбар хариуцсан мэргэжилтэн Н.Мандалтай холбогдон тодруулна уу.

Холбогдох утас: 95954909, И-мэйл хаяг: mandal.n@mglbar.mn

ХУУЛЬЧДЫН ХОЛБООНЫ ХЭВЛЭЛ МЭДЭЭЛЭЛ,

ОЛОН НИЙТТЭЙ ХАРИЛЦАХ ХЭЛТЭС