Монголын Хуульчдын холбооны хоёрдугаар Их хурлаар зарим сайн дурын хороодын төлөөлөл бүхий Зөвлөлийн гишүүнийг чөлөөлөх, батламжлах асуудлыг хэлэлцэхээр төлөвлөсөн билээ.

        Хуульчдын анхдугаар хурлаар Монголын Хуульчдын холбооны зөвлөлд 38 гишүүнийг батламжилсан. Эдгээр гишүүдээс Өмгөөлөгчдийн хорооны төлөөллийн нэг гишүүн /гадаад улсад урт хугацаагаар суралцах болсон/, Прокурорын хорооны төлөөллийн нэг гишүүн /төрийн өөр албан тушаалд томилогдсон/ тул Зөвлөлийн гишүүний үүрэгт ажлаасаа чөлөөлүүлэх хүсэлтээ гаргасан байна. 

        Мөн Хуульчдын холбооны зөвлөлийн  2014 оны 03 дугаар сарын 01-ний өдрийн хурлын 38 дугаар тогтоолоор батламжлагдсан "Эвлэрүүлэн зуучлалыг дэмжих асуудал эрхэлсэн хороо"-оос Хуульчийн эрх зүйн байдлын тухай хуулийн 49 дүгээр зүйлийн 49.8 дахь хэсгийг үндэслэн хорооны гишүүд дотроосоо нэг төлөөллөө сонгон, Зөвлөлийн бүрэлдэхүүнд оруулахаар санал гаргасан.

        Иймд тус холбооны Өмгөөлөгчдийн хороо, Прокуроруудын хороо, Эвлэрүүлэн зуучлалыг дэмжих асуудал эрхэлсэн хорооны гишүүдийн дунд Зөвлөлийн гишүүнд нэр дэвшүүлэх үйл ажиллагааг 2015 оны есдүгээр сарын 26-ны өдрийн 08:00 цагаас есдүгээр сарын 28-ны өдрийн 22:00 цаг хүртэл www.mglbar.mn цахим хуудасны “Сонгуулийн цахим систем”-ээр дамжуулан явуулахаар боллоо. Нэр дэвшүүлэх ажиллагаанд тухайн хороонд харьяалагдаж буй гишүүн бүр өөрийн нэрээ дэвшүүлэх эрхтэй юм.

        Нэр дэвшүүлэх ажиллагаа дууссаны дараа Зөвлөлийн гишүүнд нэр дэвшигчид санал өгөх ажиллагааг 2015 оны есдүгээр сарын 29-ны 08:00 цагаас 2015 оны есдүгээр сарын 30-ны өдрийн 22:00 цаг хүртэлх хугацаанд явуулна.